Mukangarambe ubu afite icyizere n’ubwo Jenoside yamupfakaje

Kubaho mu bukene bukomeye, gutura muri shitingi imvura yagwa bakitwikira umutaka… ni bimwe mu bibazo by’ingutu Mukangarambe yahanganye nabyo nyuma ya Jenoside yahitanye umugabo we. Uyu mupfakazi wa Jenoside yakorewe Abatutsi utuye mu Murenge wa Jali mu karere ka Gasabo ubu arera abana be bane  yasigiwe n’umugabo wishwe muri 1994 muri Jenoside yakorewe Abatutsi.

Mukangarambe yabwiye Umuseke ko nyuma y’uko umugabo yitabye Imana yakomeje kurwanira ishyaka abana yamusigiye  nyuma y’inzira ndende yo kurokoka .

Avuga ko yahuye n’ubuzima bubi, kuba yari afite abana bane byari ikibazo gikomeye kubabonera imibereho n’ibindi nkenerwa.

Avuga ko yabaga muri Shitingi ikikijwe n’ibihuru n’urubingo yahabaye nk’uwahahamutse, atagera aho abandi bari imvura yagwa iyo muri shitingi afite umutaka bakitwikira.

Ngo aho amenyeye umuryango AVEGA yaje kugenda agira icyizere cyo kubaho ndetse n’ihungabana rigenda rigabanuka ubwo yahuraga n’abandi bapfakazi bakamuba hafi.

Yagize ati:  “Abana banjye nababundikiraga nk’uko inkoko ibundikira imishwi, twabaye muri shitingi imvura yagwa tukitwikira umutaka. Uturere dutangiye gufasha abatishoboye  Akarere kaje kumpa ubufasha.”

Avuga ko yatangiye kugira icyizere ubwo abana be batangiye kugera mu mashuri yisumbuye, akomeza kubarera yaburara  bakaburara, abakobwa n’abahungu bakajyana  amavuta amwe ku ishuri ndetse rimwe na rimwe akabohereza ku ishuri ntacyo bajyanye abizeza ko azabasura vuba.

Avuga ko ubu afite umwana wiga Kaminuza, abandi nabo bafite icyizere cyo kuzayigeramo.

Mukangarambe ubu, afite inka yahawe na AVEGA muri gahunda ya Girinka, avuga ko arya akaryama nubwo agihura na bimwe mu bibazo ariko ngo afite icyizere.

Uyu mupfakazi wa Jenoside avuga ko kuba u Rwanda rugiye kwizihiza imyaka 20 yo Kwibohora ngo n’abapfakazi ba Jenoside hari byinshi babivugaho kuko nkawe ubwe ntiyabonaga  ko yabaho nk’uko ameze  ubu.

Kuri uyu wa 21 Kamena 2014, Umuryango Dot Rwanda wamuhaye ubufasha wari wamugeneye mu rwego rwo kumufasha kwibeshaho.

Uyu muryango wabikoze  nyuma y’uko wari uvuye ku Rwibutso rwa Jenoside yakorewe Abatutsi ruherereye ku Gisozi, mu Mujyi wa Kigali nyuma bakajye kumusura kuri Jali.

Nk’uko Nzeyimana Emmanuel umwe mu bayobozi ba Dot Rwanda abivuga, ibi bikorwa byo kwibuka Jenoside  no gufasha abayirokotse  biri muri gahunda yawo yo kwifatanya n’Abanyarwanda mu gikorwa cyo Kwibuka no gufasha imiryango y’abarokotse Jenoside.

Asanga ibi  bikwiye gukangura urubyiruko  gusubiza amaso inyuma bakareba icyo bakora mu guteza imbere igihugu.

Dot Rwanda ni umuryango ukomoka muri Canada, ubu ukorera ibikorwa byayo mu turere 16 aho bagira urubyiruko  60 rubafasha guhugura urundi mu kwihangira imirimo,ubushabitsi ndetse n’ikoranabuhanga.

Photos/Eric Birori/UM– USEKE

BIRORI Eric
ububiko.umusekehost.com