Kuki Senderi yisanisha n’Uturere igitaramo cya PGGSS IV kigezemo?

Ubundi amazina ye ni Eric Senderi Nzaramba, nk’umuhanzi ariko akaba azwi ku mazina ya Senderi International Hit. Yavukiye mu Ntara y’I Burasirazuba mu Karere ka Kirehe, Umurenge wa Nyarubuye, Akagari ka Nyarutunga ubu akaba atuye mu mujyi wa Kigali.

Senderi ubu ni umwe mu bahanzi bakomeye bakora injyana ya Afrobeat mu Rwanda nyuma y’aho yegukanye igihembo cya Salax Award nk’umuhanzi wahize abandi muri iyo njyana mu mwaka wa 2013.

Mu kiganiro na UM– USEKE, Senderi International Hit yatangaje imwe mu mpamvu yaba yambara imyenda ijyanye n’ibikorwa bibera mu Turere ibitaramo bya Primus Guma Guma Super Star 4 bigezemo.

Yagize ati “Ntabwo nkora muzika mu buryo bwo kwishimisha gusa, ahubwo nkora muzika nk’akazi kantunze.

Kuko burya baca n’umugani mu Kinyarwanda ngo “Utazi ubwenge ashima ubwe”. Niyo mpamvu rero ngomba gukora ibishoboka byose izina ryanjye rikaguma mu mitwe y’abantu ntitaye ku magambo bamvuga.

Kuba rero njya mu bitaramo bya PGGSS 4 nkambara imyenda isa n’ibikorwa bikorerwa muri ako Karere, ni uburyo bwo kurushaho kwiyegereza abakunzi banjye ndetse n’abakunzi ba muzika muri rusange”.

Senderi yakomeje atangaza ko afite byinshi ahishiye abakunzi ba muzika nyarwanda, kandi ko ibyo batari bamenyereye mu bahanzi bo mu Rwanda ariwe ugiye kubizana. Gusa ntabwo yatangaje ibyo bimwe avuga ko agiye kuzana bishyashya.

Joel Rutaganda

ububiko.umusekehost.com