Christopher yakize uburwayi yari amaranye iminsi

Muneza Christopher umuhanzi mu njyana ya R&B mu Rwanda, akaba n’umwe mu bahanzi bakunzwe cyane muri iki gihe, aratangaza ko ubu imbaraga ari zose nyuma y’aho yari amaze iminsi arwaye indwara y’umutwe.

Byagaragaye ko Christopher arwaye ubwo yahamagarwaga kujya kuri stage mu gitaramo cya Primus Guma Guma Super Star IV giherutse kubera i Ngoma mu Ntara y’Iburasirazuba akaririmba iminota itageze ku 10. Bituma abantu bibaza ibyo akoze.

Nyuma y’aho nibwo byaje kumenyekana ko yari arwaye ndetse n’aba MCs bahita babisobanurira abakunzi ba Christopher bari batangiye kwijujuta ku byo abakoreye.

Mu kiganiro na UM– USEKE, Christopher yatangaje ko indwara yari amaranye iminsi y’umutwe, ubu yumva ameze neza ndetse ko abakunzi be batuye i Rwamagana azakora uko ashoboye akabashimisha uko babyifuza.

Yagize ati “Nagize ikibazo ndwara umutwe bituma ntitwara neza nkuko nari nabiteguye, gusa ubu meze neza cyane akandi n’imyiteguro ndimo kuyikorana n’abandi nta kibazo mfite. Ahubwo abakunzi banjye b’i Rwamagana banyitege”.

Ni ku nshuro ya kabiri Christopher yitabira irushanwa rya Primus Guma Guma Super Star, dore ko yaryitabiriye bwa mbere mu mwaka wa 2013 ariko akaza kuvamo mu mubare w’abahanzi 5 bavuyemo mbere. Ubu noneho hakaba hibazwa abahanzi 3 bazagera ku mwanya wa nyuma nimbi azaba arimo.

Joel Rutaganda

ububiko.umusekehost.com