Riderman agiye kumurika album iriho indirimbo imwe gusa y’ikinyarwanda

Gatsinzi Emery uzwi cyane nka Riderman  aratangaza ko agiye gushyira hanze album iriho indirimbo 9 ariko imwe gusa ariyo izaba iri mu Kinyarwanda. Iyi Album arayimurika mu kwezi gutaha.

Hashize iminsi uyu muhanzi atumvikana cyane muri muzika, we yemeza ko amaze igihe ahugiye ku gutegura uyu muzingo w’indirimbo icyenda zigamije guha ubutumwa n’abatavuga Ikinyarwanda n’abumva izo ndimi.

“Maze iminsi nsa naho ncecetsemo ukuntu, ariko ni uburyo bwo gushyira imbaraga kuri album ndimo gutegura izajya hanze mu mpera z’ukwa gatandatu uyu mwaka.

Ikindi ni uko iyo album izaba iriho indirimbo zigera ku icyenda ‘9’, ariko hakazaba hariho imwe gusa ikoze mu Kinyarwanda, ebyiri mu Kirundi izindi esheshatu ziri  mu gifaransa.”

Gutegura iyi Album imeze ityo ngo ntabwo ari umurimo akaba ariyo mpamvu atumvikanaga cyane ariko ubu akaba avuga ko hasigaye akazi k’abatunganya muzika (producers) ko kuzitunganya ubundi akazimurika.

Usibye kwagura isoko rye rya muzika mu batavuga ikinyarwanda, Riderman avuga ko gukoresha indimi nyinshi muri iyi Album ye birimo no kugirango ubutumwa atanga bugere no ku batavuga Ikinyarwanda.

Iyi Album ye nta zina arayiha kugeza ubu, gusa ngo ari kubyitondera naryo araritangaza mu minsi iri imbere, nyuma y’iyi akazahita nabwo atangira gutegura indi Album azamurika mu Ukuboza 2014.

Iyi Album nshya nimara gusohoka, Riderman avuga ko azakora ibitaramo bitandukanye mu Ntara ndetse n’amashusho ya zimwe mu ndirimbo ziyiriho kimwe n’amashusho y’indirimbo ziri kuri Album yasohoye mu mpera z’umwaka ushize yise “IGIKONA”.

Uyu muhanzi yakunzwe mu ndirimbo nka “Holo”, “Rutenderi”, “Amatopito”, “Igitangaza” n’izindi zakunzwe cyane n’urubyiruko.

Mu banyamuzika mu Rwanda, Riderman ni umwe mu bagaragaza gahunda ndende y’urugendo rwa muzika ruri imbere iyo uyimubajijeho. Niwe uheruka kwegukana irushanwa rya Primus Guma Guma Super Star nyuma yo gushyigikirwa n’imbaga y’abantu ku buryo bugaragarira buri wese wakurikiranye iri rushanwa riheruka.

Joel Rutaganda
ububiko.umusekehost.com