Hope wegukanye TPF6 arabarizwa muri Label ya Future Records

Irakoze Hope umuhanzi wegukanye irushanwa rya Tusker Project Fame ku nshuro ya gatandatu ahagarariye igihugu cy’u Burundi, ubu arabarizwa muri Label ya Future Records ikorerwamo na David Pro i Kigali.

Hope abaye umuhanzi wa gatatu witabiriye irushanwa rya Tusker Project Fame uzajya akorera muri Future Records nyuma ya Alpha Rwirangira na Jolis Peace.

David umuyobozi wa Future Records yabwiye Umuseke ko ari ishema kuri we kubona abahanzi bakomeye baza bagana studio ye.

Ati “Bidutera imbaraga cyane kuba aba bahanzi baza bagana studio nkoreramo, gusa ariko binyereka ko hari akazi nkora kandi ngomba kurushaho gukora cyane”.

Abajijwe amasezerano afitanye n’aba bahanzi, yatangaje ko nta masezerano runaka bafitanye, ko bose ari abahanzi bazi icyo gukora kandi ko badashobora kubangamirana mu kazi bakora, ibyo bumvikanye byose babishyira mu ngiro hatiriwe hakorwa amasezerano.

Hope Irakoze agiye muri Label ya Future Records asangamo Alpha Rwirangira benshi bemeza ko aba bahanzi bafite amajwi akomeye kimwe, bityo bakaba bashobora kuzakora akazi gashimishije muri iyi studio.

Reba Hope asubiramo indirimbo yitwa ‘All of Me’ ya John Legend.

[youtube url=”https://www.youtube.com/watch?v=XkjcE4rnpoM” width=”560″ height=”315″]

Joel Rutaganda

ububiko.umusekehost.com