Bruce Melodie ngo kuba yarakoranye na K8 indirimbo ni inzozi yakabije

Itahiwacu Bruce umuhanzi uzwi muri muzika nka Bruce Melodie, aratangaza ko kuba yarakoranye indirimbo yise ‘Tayali’ n’umuraperi w’umunyarwanda uri muri Leta Zunze Ubumwe z’Amerika uzwi nka K8 Kavuyo, ari zimwe mu nzozi yakabije.

Impamvu yatumye Bruce Melodie akorana na K8 indirimbo, ngo ni uko ari umuhanzi ukora injyana ya HipHop yemera ubuhanga bwe.

Bruce Melodie yagize ati “K8 ni umwe mu bahanzi numvaga nifuza kuba nakorana nabo indirimbo, kuko kuva nkiri na muto ntaratangira muzika nakundaga kumva indirimbo ze”.

Bruce Melodie ari mu bahanzi 10 bari mu irushanwa rya Primus Guma Guma Super Star IV. Abajijwe uko abona iri rushanwa ku nshuro ye ya mbere aryinjiyemo, avuga ko we ategereje cyane ibitaramo bya Live.

Yagize ati “Ibi bitaramo bya Playback bitinze kurangira, kuko numvaga ntazaririmbira kuri CD, ariko kubera ari itegeko narabikoze. Gusa ibitaramo bya Live nibitangira nibwo nzumva nishimye kurushaho.

Nidutangira kuririmba by’umwimerere nibwo twese uko turi 10 abakunzi bacu ndetse n’abakunzi ba muzika nyarwanda bazabona ko mu Rwanda hari abahanzi bazi muzika”.

Kimwe mu bitaramo bizaba Live kizaba gikomeye, kuko hari n’abahanzi bagomba guhita basezererwa, kiza ku itariki ya 12/7/2014 i Rubavu mu Ntara y’Iburengerazuba.

Umva indirimbo ‘Tayali’ Bruce Melodie yakoranye na K8 Kavuyo.

[youtube url=”https://www.youtube.com/watch?v=O6BbuR3yUEY” width=”560″ height=”315″]

Joel Rutaganda

ububiko.umusekehost.com