Kuba Knowless atari muri PGGSS ngo sibyo bituma atagaragara

Butera Jeanne d’Arc uzwi nka Knowless muri muzika, aratangaza ko abakomeje kuvuga ko atacyumvikana cyane kuko atari mu irushanwa rya Primus Guma Guma Super Star atari byo, ahubwo ko hari ibyo ahugiyemo kandi bizatungura benshi mu minsi ya vuba.

Ibi abitangaje nyuma y’aho benshi mu bakurikirana muzika nyarwanda  bavuga ko yaba yarahaye umwanya abandi bahanzikazi barimo Teta Diana n’abandi ngo nabo bamenyekane kurushaho.

Knowless yatangarije Umuseke ko afite ibyo ahugiyemo.

Yagize ati “Maze iminsi numva ahantu henshi bavuga ko nshobora kuba ntarimo kugaragara cyane muri muzika kubera ko ntari muri Guma Guma, ariko siyo mpamvu pe.

Maze iminsi ndi gushyira imbaraga mu itegurwa rya album yanjye  nzamurika mukwa karindwi (2014), ndifuza kuzakora ibyo ntigeze nkora mu zindi album zose nagiye nshyira hanze kuko maze igihe kinini nyitegura.

Ubwo abakunzi banjye ahubwo ndetse n’abakunzi b’ibihangano nyarwanda muri rusange mbararikiye ukwezi kwa 7 icyo gitaramo uko kizaba kimeze”.

Abajijwe izina rya album ari gutegura, yavuze ko atari yahitamo izina ryayo, gusa ko hateganyijwe kuzaba hariho indirimbo hagati ya 7-10 nshya.

Iyi album izaba ibaye iya gatatu Knowless azaba ashyize hanze, nyuma ya ‘Komeza’ yamuritse bwa mbere iriho indirimbo 10 na ‘Uwo ndiwe’ yamuritse bwa kabiri nayo iriho indirimbo 10.

Mu minsi ishize rero Knowless yegukanye ibihembo bigera kuri 4 bya Salax Awards ndetse anahabwa igihembo cy’umuhanzi w’umwaka.

Icyo gihembo ni ubwa mbere cyari cyegukanywe n’umuhanzikazi, ku nshuro zigera kuri eshanu zabanje ibyo bihembo byatwarwaga n’abasore gusa.

Joel Rutaganda
ububiko.umusekehost.com