Amahirwe ku bato n’abatamuzi yo kubona igihangange Kayirebwa

Bwa mbere Cecile Kayirebwa agiye kuririmbira abanyarwanda indirimbo ze zose bajyaga bumva, abakuru nibo bamuzi, bose nabo ntibamubonye, ku bato ni amahirwe yo kumubona yizihiza isabukuru y’imyaka 30 mu muziki, ni kuwa 16 Werurwe ku Kicukiro.

Ubwo yagiranaga ikiganiro n’abanyamakuru mu ntangiriro z’iki cyumweru, yavuze ko ashimishijwe no kuza kwizihiza imyaka 30 muri muzika aririmbira abanyarwanda indirimbo ze yaririmbye mu 1990 kugeza mu 1995.

Abantu benshi bumvise kandi bakunda indirimbo za Kayirebwa Cecile. Indirimbo nka “Twaza” zakoze ku mitima ya benshi abato n’abakuru kubera ubuhanga mu kurata ibyiza by’u Rwanda no kurukundisha bene rwo.

Abato bumvise nabo indirimbo nyinshi z’uyu muhanzi mukuru, yabaye urugero ku bahanzikazi benshi b’ubu, ariko benshi ntibamuzi imbona nkubone ndetse ntibaramubona aririmba kuko yabaye cyane kandi atuye mu Bubiligi.

Igitaramo cye cyo ku cyumweru kizabera muri salle nini ya “Ahava River” ku Kicukiro ugana ahitwa i Nyanza ya Kicukiro, amatike y’iki gitaramo aragurirwa kuri Hotel ya Milles Collines kuri MTN Center i Nyarutarama, kuri Tele 10 ku Gishushu no kuri Pharmacie iri mu mujyi i Kigali yitwa ‘Discount For Early Bird’.

Kayirebwa nta gahunda yatanze yo kuba yasanga abanyarwanda bakunda ibihangano bye bari mu Ntara gusa avuga ko muri aya mezi agifite ibikorwa azakorera mu Rwanda.

“Ni umukobwa” imwe mu ndirimbo za Kayirebwa zakunzwe

Joel Rutaganda
ububiko.umusekehost.com