Abanyeshuri b'Abadage bagiye kunyomoza abasebya u Rwanda

Itsinda ry’abanyeshuri b’Abadage bakoze urugendo shuri  rw’umwaka mu bihugu bitandukanye by’Afurika n’u Rwanda rurimo baratangaza ko bafashe umwanzuro wo guhindura imyumvire mibi abatuye mu bihugu byo mu Burengerazuba bw’Isi  bari bafite  k’u Rwanda.

Aba banyeshuri batangaza ko barimo gutegura igikorwa  cyo kwerekana imiterere n’ibyiza by’imijyi itanu na Kigali irimo.

Muri iki gikorwa bazaba bagamije  kwereka amahanga ukuri nyako kuri  Afurika gutandukanye n’uko byajyaga basoma cyangwa bumva mu bitangazamakuru mpuzamahanga.

Iki gikorwa  kiswe  “Sichtwechsel: Stadtbilder aus Afrika” mu kigade kizabera ahitwa Mannheim mu gihugu cy’u Budage muri Nzeli uyu mwaka.

Ubwo bari murugendo shuri kuri uyu mugabane bagenda bakora imirimo y’ubukorera bushake , aba banyeshuri babonye ko kuri muri Afurika  hari ibintu byiza byinshi  batari bazi mbere. Nk’uko The Newtimes dukesha iyi nkuru ibitangaza.

Sören Götz, umwe muri aba banyeshuri avuga ko bizeye ko igikorwa bazakora cyo kwerekana ishusho nyayo  y’Afurika cyizafungura amaso abatuye k’umugabane w’u Burayi  bari bafite ishusho itari yo bakuye mu bitangazamakuru mpuzamahanga.

Yagize ati:”kubera ikabiriza ry’ibitangazamakuru Abadage benshi  nti bazi ibyiza by’imijyi imwe n’imwe  yo ku mugabane w’Afurika. Ariko muri iri murikagurisha  turifuza guhindura iyi myumvire tubereka ibyiza by’imijyi igera kuri itanu twabahitiyemo”.

Aba banyeshuri kandi barahamagarira abanyabugeni bo mu Rwanda kuboherereza ibihangano bya bo kugira ngo bazabyifashishe  muri iri murikagurisha ngo kuko bifuza guhindura imyumvire y’Abanyaburayi bakoresheje ibihangano bigaragaza ubwiza bw’iyi mijyi byakozwe n’abayituye.

Agira ati:”Turahamagarira abanyabugeni kutwoherereza ibihangano bya bo kugira ngo tuzabyifashishe muri iri murikagurisha. Igitekerezo cyacu ni ukwerekana  imijyi twifashishije ibigaragaza uko abayituyemo bayibona”.

Donatha Umurungi, ukora umwuga wo gufotora mu Mujyi wa Kigali avuga ko ibi ari amahirwe  akomeye kubakora  uyu mwuga . Agira ati:”Aya ni amahirwe kuko abakora umwuga wo gufotora bagiye kubona amahirwe yo kuvuga ukuri ku Rwanda batibagiwe  kwerekana ibihe bikomeye u Rwanda rwanyuzemo”

ububiko.umusekehost.com