Umusaza Harolimana agiye guhabwa amafaranga yari yarariganyijwe

Harolimana Deocles , umusaza w’imyaka 57, wari umaze igihe ategereje ubutabera kuva mu mwaka w’ 1996, kuri uyu wa 19 Gashyantare 2014 nibwo yabashije gukemurirwa ikibazo n’ubuyobozi bw’Akarere ka Rulindo ubwo bwari bwasuye Umurenge wa Buyoga uyu musaza atuyemo.

Ni  nyuma y’uko Nshimiyimana Jean Nepo wari konseye muri icyo gihe amukubitiye umugore bikanamuviramo gupfa, ariko uyu wahamijwe n’urukiko kumupfakaza nti yemera kumuha indishyi z’akababaro zihwanye na miliyoni  imwe n’ibihumbi 600 by’amafaranga y’u Rwanda yaciwe akanga kuyatanga  yitwaje ko nta bushobozi kandi bigaragara ko afite imitungo.

Harolimana deocles , ufite  abana batanu  yasigiwe na nyakwigendera avuga ko n’ubwo yababajwe n’uburyo yapfakajwe by’amaherere, ashimishijwe cyane n’uburyo ubuyobozi bushoboye gukemura ikibazo cye nyuma y’igihe kinini ajuragizwa n’uwamupfakaje yanga kumuha iby’ubutabera bwamutegetse.

Halorimana yemeza ko uwamwiciye atabuze ubwishyu kuko mu byo atunze harimo moto n’ishyamba.

Kangwagye Justus, Umuyobozi w’Akarere ka Rulindo mu gukemura ikibazo cy’uyu musaza yasabye ko moto ya Nshyimiyimana  wavugaga ko imitungo ye yose n’iyi moto irimo ari ingwate ya banki ifatirwa, hanyuma ku munsi ukurikiyeho bikurikije amategeko hagasuzumwa ahandi hakurwa ibyo kuvanwamo ubwishyu yategetswe n’urukiko.

Kangwagye yagaye cyane abayobozi bari basanzwe bazi iki kibazo ariko batabashije kurenganura uyu muturage, abasaba kwisubiraho.

Yasabye kandi abaturage kwirinda ubushyamirane, kandi bakabasha kwikemurira ibibazo bito bito  nka mituweri, bakanareka umuco ufitwe na bamwe  wo gushaka gushyirwa cyangwa kuguma mu byiciro bihabwa inkunga  bagaharanira  kwigira  kuko  ngo ik’imuhana kaza imvura ihise.

ububiko.umusekehost.com