THAA igiye guhemba abakinnyi ba Sinema bitwaye neza muri 2013

Ku nshuro ya mbere A Thousand Hills Academy Award igiye gutanga ibihembo ku bakinnyi ba Sinema, aba Producers, abafata amashusho (Cameraman) ndetse n’abayobora amafilimi (Directors) bitwaye neza kurusha abandi mu mwaka wa 2013.

A Thousand Hills Academy Award ni ihuririo ry’abakinnyi, abayobozi ba filimi ndetse n’abafata amashusho bishyize hamwe.

Nk’uko byari bisanzwe bikorwa n’andi masosiyete atanga ibihembo ku bakinnyi bitwaye neza, gusa ugasanga hirya no hino haravugwa ukubogama ku mpande zimwe na zimwe, A Thouusand Hills Academy yazanye itandukaniro nk’uko bitangazwa n’abagize ihuriro.

Mu gutanga ibihembo uko bizagenda, hatumiwe bamwe mu nzobere mu bijyanye na sinema ari na bo bazahitamo abakinnyi ndetse na filimi zarushije izindi gukinwa neza habanje kurebwa izo filimi ndetse n’uko abazikinnye bitwaye.

Bityo rero kuri iyi nshuro uzahiga abandi nta mwikomo azagaragarizwa kuko hatumiwe abanyamahanga bataziranye n’abakinnyi cyangwa aba producers.

Biteganyijwe ko ku cyumweru tariki ya 23 Gashyantare 2014 ari bwo icyo gikorwa kizabera kuri Petit Stade i Remera aho kwinjira bizaba ari ubuntu ahasanzwe ndetse n’ufite ubutumire ‘Invitation’ akazicara mu myanya y’icyubahiro ‘VIP’.

Joel Rutaganda
ububiko.umusekehost.com