“Niba ukunda umuntu koko nta mpamvu yo kumuhisha”- Alpha Rwirangira

Ku munsi wahariwe abakundana ku Isi hose wizihizwa tariki 14 Gashyantare  buri mwaka, umuhanzi Alpha Rwirangira aragira inama abahanzi bagenzi be bafite abo bakundana kubishyira ahabona kuko ngo mu gihe ufite umuntu wihebeye nta mpamvu yo kutamwereka abandi ngo bamumenye.

Mu kiganiro na UM– USEKE, Alpha Rwirangira ubu uba muri Leta Zunze Ubumwe z’Amerika kubera impamvu z’amasomo, yagiriye inama abakundana by’umwihariko abahanzi bagenzi be kwereka abantu abankunzi babo kuko ngo biri mu bintu bituma uwo ukunda akugirira icyizere .

Yagize ati “Kenshi na kenshi usanga abantu bavuga ko abahanzi tutagira umukobwa umwe, rero ni byiza ko ufite uwo wiyeguriye umwerekana ukavana urujijo mu bantu kuko nta muntu udakunda.”

Mu mwaka ushize wa 2013 , Alpha Rwirangira we yatangaje ku mugaragaro ko ari mu rukundo na Uwingabire Esther, wigeze kuba Nyampinga w’Intara y’Iburengerazuba mu Karere ka Rubavu.

Byagiye bivugwa kandi ko bitarenze uyu mwaka wa 2014, Rwirangira n’umukunzi we bashobora kwiyemeza kubana ubuziraherezo bagashinga urugo.

Joel Rutaganda
ububiko.umusekehost.com