Riderman agiye gushyira hanze album itariho indirimbo n’imwe y’Ikinyarwanda

Ku nshuro ya mbere Riderman agiye gushyira hanze umuzingo ‘Album’ iriho indirimbo zigera kuri zirindwi zitari mu rurimi rw’Ikinyarwanda nk’uko abantu bari bamaze kubimenyera ku bahanzi nyarwanda.

Iki gitekerezo Riderman akigize nyuma y’aho aherutse gushyira hanze album yise ‘Igikona’ imwe muri album iriho indirimbo zakunzwe cyane, bityo akaba yumva yanashyira hanze iyi arimo gukoraho bizafasha abakunzi be batumva ururimi rw’Ikinyarwanda kurushaho kumva icyo zisobanuye.

Mu kiganiro na Umuseke, Riderman yagize ati “Ndimo gukora kuri album yanjye nteganya gushyira hanze mu kwezi kwa Gicurasi 2014 izaba ikoze mu ndimi zitari Ikinyarwanda.

Rider Mana akomeza agira ati “Zimwe muri izo ndimi hazaba harimo, iz’Icyongereza, Igifaransa ndetse n’Ikirundi. Bikazamfasha gutuma ibihangano byanjye aho bajya hose umuntu yakumva ubutumwa mba nshaka gutambutsa aho kumva izikoze mu Kinyarwanda atumva icyo bivuze.”

Abajijwe izina ry’iyo album, Riderman yatangaje ko atari yahitamo izina azayita gusa mu minsi mike ko azaba yamaze guhitamo izina ryayo.

Joel Rutaganda
ububiko.umusekehost.com