Rayon Sports yatsinze Kiyovu 3-1

Umukino wo ku munsi wa 15 wa shampiyonnat(Turbo King National Football League) wari witezwe n’abakunzi benshi kubera umukino w’ibigugu, Rayon Sports yahaye isomo Kiyovu Sports iyitsinda ibitego bitatu kuri kimwe.

Rayon Sports yatangiranye ishyaka ryinshi bamwe bakavuga ko utakeka ko iheruka kubura umutoza.

Ku munota wa cumi gusa Kambale Salita Gentil wa Rayon yahawe umupira mwiza na Kagere Meddie maze ntiyazuyaza ateramo n’umutwe igitego cya mbere kiba kiranyoye, abarayon bari benshi bajya hejuru.

Ikipe ya Rayon Sports yakomeje gusatira cyane Kiyovu ariko n’ubwo iyi kipe y’i Nyamirambo nayo yanyuzagamo ikazamukana umupira(Contre Attaque).

Ba myugariro ba Kiyovu nka Mukamba Musombwa bari bafite akazi katoroshye ko gufunga Ndayisenga Fuad,Hamiss Cedrick ndetse na Kagere Meddie botsaga igitutu cyane.

Ku munota wa 35,  nyuma yo gusigana kwa myugariro Sibomana Hussein n’umuzamu we Ndayishimiye Jean Luc Bakame, rutahizamu Julius Bakkabulindi yabanyuze mu rihumye aba atsinze igitego cyo kwishyura bisubira urudubi.

Rayon Sports yatozwaga n’uwigeze kuba rutahizamu wayo Mbusa Kombi Billy yongeyemo agatege maze rutahizamu Kambale Salita arasubira atsinda igitego ku munota wa 43 igice cya mbere kirangira gutyo.

Igice cya kabiri cyatangiye ikipe ya Kiyovu ubona ifite gahunda yo kwishyura ariko myugariro mushya wa Rayon Jimmy Mukubya na Sibomana Hussein bababera ibamba.

Ikipe ya Rayon Sports yerekanye umukino mwiza mu gice cya kabiri ku buryo yarushaga gusatira Kiyovu ariko rutahizamu Kagere Meddie ahusha uburyo bumwe na bumwe bwari bwabazwe.

Umutoza wa Kiyovu Kanyankore Yaounde yaje gukuramo rutahizamu Mussa Sauva na Christian Mbirizi utigeze yigaragaza muri uyu mukino ashyiramo Tuyisenge Pekeyake na  Janvier Benedata aba  bagerageje gusatira ikipe ya Rayon ariko kureba mu izamu bikaba ikibazo.

Ku munota wa 43 w’igice cya kabiri  Fuad Ndayisenga yaciye mu rihumye abinyuma ba Kiyovu azamukana umupira arabasiga maze arekura urutambi rw’ishoti igitego cya gatatu cya Rayon Sports kiba kiranyoye nyuma y’iminota mike umupira uba urarangiye.

Ikipe ya Rayon Sports ubu yagumye ku mwanya wa kabiri kuko mukeba wayo APR FC nayo yatsinze Esperance ibitego bitatu ku busa.

Uyu mukino wa Rayon na Kiyovu witabiriwe n’umutoza mushya waje kuvugan na Rayon Sports witwa Luc Eymael.

JD Nsengiyumva Inzaghi
ububiko.umusekehost.com