AS Kigali na Espoir ziguye miswi
Kuri uyu wa 25 Mutarama wari munsi wa 15 wa Shampiyona y’u Rwanda yitwaTurbo King National Football League kuri Stade ya Kigali rwari rwambikanye hagati y’ikipe ya AS Kigali ihanganye na Espoir mukino warangiye amakipe yombi anganyije.
Ikipe Espoir y’i Rusizi yari yazanye ishyaka ryinshi kuko umukinnyi wayo w’inararibonye Ntaganda Elias yari yatangaje mbere y’umukino ko ikipe ya AS Kigali bari buyitsinde byanze bikunda.
Umukino watangiye ba rutahizamu Lomami Andre ndetse na Saidi Abed Makasi botsa igitutu ikipe ya AS Kigali, gusa ntibyabujije myugariro Bishira Latifa wa AS Kigali ko ku munota wa karindwi afungura amazamu ya Espoir akayitsinda igitego akoresheje umutwe k’umupira wari uterewe muri ‘corner’.
Ikipe ya Espoir nayo yakomeje gusatira ishaka igitego ndetse ku munota wa 26 Ntaganda Elias atsinda igitego cyiza kuri coup franc ku buryo umuzamu Emery Mvuyekure wa AS Kigali atamenye ahantu umupira waciye.
Mbere y’uko igice cya mbere kurangira amakipe yombi yakomeje kutsanya igitutu ariko habura iyatsinda igitego kabiri, igice cya mbere cyarangira amakipe yombi anganya.
Igice cya kabiri cyatangiye ikipe ya Espoir yongereye imbaraga ku buryo yarushije ikipe ya AS Kigali, ndetse Espoir y’i Rusizi igenda ibura uburyo bwinshi bwabazwe bwo gutsinda umukino urinda amakipe yombi anganyije igitego kimwe kuri kimwe.
Umutoza Kasambungo André wa AS Kigali nyuma y’umukino yemeye ko ikipe ya Espoir yamurushije bigaragara nubwo nyine ngo kurusha umuntu mu mupira ari ukumutsinda.
Mugenzi we Emmanuel Ruremesha wa Espoir avuga ko kunganya byamubabaje ariko nanone gukura inota rimwe kuri AS Kigali iwayo, ikipe izanahagarira u Rwanda mu marushanwa mpuzamahanga, kuri we atari bibi.
Undi mukino wari wahuje ikipe ya AS Muhanga yakiriye Etincelles byaje kurangira amakipe yombi nayo agabanye amanota, kuko nta nimwe yabashije kureba mu izamu.
JD Nsengiyumva Inzaghi
ububiko.umusekehost.com
English