Sudani y’Epfo: Salva Kiir arashinja UN gufasha inyeshyamba

Perezida w’igihugu cya Sudani y’Amajyepfo arashinja abakozi b’Umuryango w’Abibumbye bari mu gihugu cye kuba ku ruhande rw’inyeshyamba zirwanya ubutegetsi ndetse zari zanacuze umugambi wo kumuhirika.

Umubano hagati y’Umuryango w’Abibumbye n’iki gihugu usa n’uwajemo  agatotsi  kuva aho  imvururu zadukiye  muri iki gihugu abantu benshi bagapfa abandi bagahunga.

Nyuma y’ukwezi kumwe imirwano itangiye hagati ya guverinoma n’abashyigikiye uwahoze ari visi perezida w’iki gihugu Riek Machar, umuryango w’Abibumbye wahise utangira kugirana ibiganiro  na guverinoma ya Sudani y’Epfo.

Perezida Salva Kiir atunga agatoki uhagarariye abakozi ba UN muri iki gihugu gushaka kuba umwe mubayobozi b’iki gihugu ndetse anavuga ko UN nta gaciro yigeze iha guverinoma ya Salva Kiir.

Umuvugizi wa Perezida Salva kiir yavuze ko  guverinoma  yakomeje gushotorwa  UN ikicecekera ahubwo igakomeza gushyigikira inyeshyamba zitwaje intwaro no kuzicungira umutekano aho zari ziri mu nkambi ya Bor ho mu Murwa mukuru wa gace ka Jonglei.

Mu kiganiro ya giranye n’ikinyamakuru Aljazeera dukesha iyi nkuru kandi Salva Kiir ahakana ibirego by’Umuryango w’Abibumbye bivuga ko ingabo z’iki gihugu zishoye mu byaha by’intambara.

ububiko.umusekehost.com