Kitty Joyce nti yaretse muzika ahubwo yari ahugijwe n’amasomo

Kitty Joyce umwe mu bahanzikazi bakora injyana ya R&B mu Rwanda nyuma y’aho yari amaze igihe asa n’aho atagaragara mu bahanzi bakora cyane, aratangaza ko ubu ari cyo kintu agiye guha umwanya nyuma yo gusoza amasomo.

Ibi abitangaje nyuma y’aho amaze gukora indirimbo nshya zigera kuri eshatu kuva aho arangirije umwaka ushize mu ishuri rikuru ryahoze ari SFB ubu ryahindutse CBE ‘College of Business and Economics’.

Mu kiganiro na UM– USEKE, Kitty yagize ati: “Maze igihe kitari gito nsa n’aho ntagaragara muri muzika, ariko si uko nayiretse ahubwo hari bimwe umuntu aba agomba kubanza gusa n’aho ashyize k’uruhande birimo amasomo.

Kuva ndangije amasomo umwaka ushize nagize Imana mpita ntangira akazi ubu muzika ngiye kuyikora  nta vunika cyane kuko niyo nzaba nshyizeho umutima wanjye wose”.

Yakomeje atangaza ko amaze kugirana amasezerano y’imyaka itatu na studio yitwa ‘Future Records’ ikorerwamo na Producer David akaba amaze no kuhakorera indirimbo nshya yise ‘Coz I got you’, nyuma ni bwo bazareba ibyo bakoze byaba ngombwa bakayongera cyangwa se bakaba bayahagarika.

Kitty Joyce yavutse ku itariki ya 30 Mutarama 1989 akaba atuye mu Karere ka Kicukiro ahitwa Sonatube.

Joel Rutaganda
ububiko.umusekehost.com