Dr. Alvera Mukabaramba arakangurira abakoze jenoside gusaba imbabazi

Umunyamabanga wa Leta muri Minisiteri y’Ubutegetsi bw’Igihugu, ushinzwe imibereho myiza Dr. Alvera Mukabaramba, arahamagarira abakoze Jenoside gusaba imbabazi kugira ngo buri wese akire ibikomere yasigiwe na Jenoside.

Uyu muyobozi wavuze ibi kuri uyu wa 13 Mutarama ubwo Akarere  ka Kamonyi kashyikirizwaga urumuri rutazima ruvuye mu Karere ka Rubavu, yavuze ko  amateka y’u Rwanda yasigiye Abanyarwanda ibikomere mu buryo butandukanye.

Avuga ko rero  kugira ngo Abanyarwanda basohoke muri iryo curaburindi,  bagomba kubwizanya ukuri maze abagize uruhare muri Jenoside bakabisabira imbabazi.

Alphonse Munyantwali, Guverineri w’Intara y’Amajyepfo na we wari witabiriye uyu muhango  yavuze ko  umwanya wo kwakira urumuri rutazima atari uwo kwigirira icyizere gusa, ahubwo ko ari n’uwo gushimira abagize uruhare mu kubohora u Rwanda mu kaga rwarimo, ndetse n’abayobozi barufasha gutera imbere.

Akarere ka Kamonyi mu Ntara y’Amajyepfo kuwa kabiri tariki ya 13 Mutarama, 2014 kakiriye urumuri rw’icyizere kahawe n’abana bo mu Karere ka Ngororero, aho rwari rwagejejwe tariki 10.

Uru rumuri ni kimwe mu gikorwa  cyo kwitegura kwibuka ku nshuro ya 20 Jenoside yakorewe Abatutsi mu 1994, uru rumuri rukaba rugaragaza icyizere cy’iterambere u Rwanda rumaze kugeraho n’uko rutazasubira mu icuraburindi nk’iry’amacakubiri yateje Jenoside yakorewe Abatutsi rwanyuzemo.

Igikorwa cyo kwakira uru rumuri cyabereye  mu Murenge wa Mugina, uru urumuri ruza gushimangira icyizere cy’uko ejo hazaza hazaba ari heza ku Banyarwanda cyane cyane abacitse ku icumu bashegeshwe na Jenoside.

ububiko.umusekehost.com