CAR: Perezida Michel Djotodia mu marembera

Perezida Michel Djotodia ntari mu minsi ye myiza kuko biteganyijwe ko kuri uyu kane  ashobora kurara yeguye k’ubuyobozi  bw’inzibacyuho bw’igihugu cya Repuburika ya Centreafrique.

Ibiro ntaramakuru by’Abongereza reuters bitangaza ko  uyu mugabo ashobora kuza gutangaza ubwegure bwe mu nama y’iminsi ibiri iri yahuje  ibihugu bigize umuryango w’ubukungu w’ibihugu by’Afurika yo hagati CEEAC.

BBC yo itangaza ko iby’ubwegure bwa Perezida Djotodia  byashimangiwe  na Minisitiri w’Ubabanyi n’amahanga w’igihugu cy’Ubufaransa Laurent Fabius watangaje ko kuri uyu wa kane inama ya CEEAC izarangira   Perezida Djotodia yeguye  ku mugaragaro.

Abinyujije kuri Televisiyo y’igihugu cy’Ubufaransa yagize ati:”Ubuyobizi bw’inzibacyuho ntacyo bwakoze, niyo mpamvu hari ibyemezo bigomba gufatwa.Tugiye kureba ibyo inshuti zacu z’Abanyafurika zemeza”.

Akomeza agira ati:”Abanyafurika ni bo bifatira umwanzuro, Ubufaransa bwo buraba buhari nk’indorerezi”.

Umwe mu nkoramutima  z’uyu Perezida Djotodia yagize ati:”Ibya Perezida Djotodia ndabona byarangiye”

Mu minsi ishije uyu mugabo yari yatangaje ko yiteguye kwegura mu gihe umuryango mpuzamahanga waba ugaragaje ko ari we nyir’abayazana w’imvururu z’iri mu gihihugu cya Centreafrique n’ubwo ejo yatangazaga ko adateganya kwegura.

Iyi nama idasanzwe yatumijwe na Perezida w’igihugu cya Tchad Idriss Déby Itno uyobora umuryango wa CEEAC. Igihigu cya Tchad cyagize  uruhare mu kubungabunga amahoro muri Centreafrique ku bufatanye n’ingabo z’umuryango w’Afurika yunze Ubumwe Misca n’ingabo z’Ubufaransa zahageze ku ikubitiro.

Muri Werurwe umwaka ushize Inyeshyamba za seleka zahiritse ubutegetsi bwari buriho zishyiraho Michel Djotodia nka Perezida wa mbere w’umuyisilamu muri iki gihugu.

ububiko.umusekehost.com