TKNFL: Shampiyona irasubukurwa tariki ya 18 Mutarama

Mu gihe shampiyona y’igihugu’Turbo King National Football League’ yari imaze ibyumweru bitatu  ihagaze kubera iminsi mikuru y’Ubanani biteganyijwe ko guhera taliki ya 18 Mutarama 2014 ari bwo igomba gusubukurwa.

Iki kikaba ari icyiciro cya kabiri cya shampiyona(Retour), ikipe nka Rayon Sports igomba kwerekeza i Gicumbi, umukino ubanza Rayon Sports yatsinze Gicumbi igitego kimwe ku busa.

Muri uyu mukino kandi ni naho myugariro Usengimana Faustin yavunikiye igufa ryo ku murundi byatumye amara shampiyona yose adakina.

APR FC nayo izerekeza i Rubavu guhatana na Marines FC, ubusanzwe uyu ni umwe mu mikino yorohera APR FC gusa abakunzi benshi ba ruhago hano mu Rwanda batangazwa n’ukuntu APR FC inyagira Marines ariko Rayon Sports bikayigora.

Beshi bavuga ko Marines kuri APR ikina nta bushake kubera ari  amakipe y’abavandimwe(Gisirikare), gusa muri ruhago ibi nti bibarwa.

Umukino w’undi ukomeye ugomba guhuza ikipe ya Kiyovu Sport na Musanze kuri Stade ya Kigali, ikipe ya Kiyovu Sports imaze imikino itatu na yo ititwara neza kuko yose yayitsinzwe.

Uyu uzaba ari umukino kuri Kanyankore Yaounde wo kugarura ikizere ku bakunzi b’ikipe ya Kiyovu Sports, uyu mutoza kandi yanatangaje ko ikipe izatwara igikombe izamenyekano mu mikino yo kwishyura umunani ya mbere.

Dore uko amakipe azahatana ku munsi wa 14

• Esperance vs Police (Stade Mumena)
• Mukura VS vs Muhanga (Stade Muhanga)
• Espoir vs Etincelles (Stade Rusizi)
• Amagaju vs AS Kigali (Stade Nyagisenyi)
• Marines vs APR FC (Stade Umuganda)
• Gicumbi vs Rayon Sports (Stade Gicumbi)
• Kiyovu Sports vs Musanze (Stade Kigali)

JD Nsengiyumva Inzaghi
ububiko.umusekehost.com