Ubuholandi n’u Rwanda bigiye guhangana n’abinjira n’abasohoka mu buryo butemewe

 Minisitiri w’ububanyi n’amahanga n’ubutwererane  mu Rwanda Louise Mushikiwabo na Fred Teevens Minisitiri ushinzwe  Umutekano, Ubutabera n’abinjira n’abasohoka  mu gihugu cy’Ubuholandi bashyize umukono ku masezerano y’ubufatanye  mu kurwanya abinjira  n’abasohoka muri ibi bihugu mu buryo butemewe n’amategeko.

Amakuru dukesha urubuga rwa Minisiteri y’ububanyi n’amahanga mu Rwanda avuga ko Minisitiri Mushikiwabo yishyimira uburyo umubano w’ibi bihugu byombi ukomeza gukura cyane cyane mu birebana n’Ubutabera.

Yagize ati:” Ubutabera ni  ikintu gikomeye ugendeye ku mateka yaranze u Rwanda. twakomeje gushaka uburinganire hagati y’Ubutabera n’ubwiyunge. Uruhare rw’Ubuhorandi mu kubaka no ko kuvugurura Ubutabera bw’u Rwanda bifite ikintu kinini bisobanuye ku Rwanda”.

Minisitiri Mushikiwabo yakomeje avuga ko u Rwanda rwifuza gukomeza gukorana n’Ubuholandi mu nzego zitandukanye zirimo  Ubucuruzi n’ishoramari mu by’Ubucuruzi.

Minisitiri Teevens yavuze ko Guverinoma y’igihugu cye yishimira imikoranira ifitanye n’ u Rwanda ikaba ishaka gukomeza kuyishimangira  mu bijyane n’abinjira n’abasohoka.

Yagize ati:”Twakoze byinshi dufatanyije mu bijyanye n’Ubutabera kandi ndizerako tuzanabakora byinshi mu bijyanye no mu gice cy’abinjira n’abasohoka.”

Minisitiri Teevens yashimye u Rwanda uburyo rwahaye Ubuhorandi amahirwe yo kurushoramo imari kandi anavuga ko bazakomeza kureba uburyo bakorana  n’u Rwanda mu bijyanye n’Ubuhinzi  ndetse n’ubuhinzi.

Mu ruzinduko rwe rw’iminsi itatu mu Rwanda uyu mu Minisitiri yagiye asura ahantu hatandukanye. Yasuye u rwibutso rwa Gisozi, Polisi y’u Rwanda, ububiko bw’ibyavuye mu manza za Gacaca, gereza ya Mpanga  n’u Rwibutso rwa Nyamata.

Minisitiri Teevens kandi  yanasuye Minisiteri y’Ubutabera agirana ikiganiro na Minisitri Busingye Johnston amubwira ko Ubuhorandi bwiteguye kohereza Abanyarwanda bakurikiranyweho Jenoside bari muri iki gihugu cyane cyane uwitwa Iyamuremye Jean Claude.

ububiko.umusekehost.com