“2015 ntabwo yampiriye, ubu niteguye 2016”- Christopher

Christopher umuhanzi mu njyana ya R&B mu Rwanda wakunzwe mu ndirimbo nyinshi z’urukundo zagiye zikundwa n’urubyiruko runini, avuga ko umwaka wa 2015 uri mu myaka itaramugendekeye neza nkuko yabyifuzaga. Ahubwo ngo yamaze gutegura 2016.

Ku nshuro ya gatanu irushanwa rya Primus Guma Guma Super Star riba mu Rwanda, uyu muhanzi ntiyigeze agaragara mu bahanzi bakunzwe 10 bakoze cyane mu mwaka wa 2015.

Uretse rero kuba ataritabiriye iryo rushanwa, Christopher avuga ko hari izindi gahunda yari afite kuzakora muri uyu mwaka ariko zimwe na zimwe zikaba zitarakunze ko azikora.

Ubwo yashyiraga hanze amashusho y’indirimbo ‘Dutegereje iki?’, yatangaje ko ari igikorwa cya mbere akoze cyinjiza abafana be mu mwaka wa 2016 nta rungu.

Mu kiganiro na Umuseke, Christopher yagize ati “Mfite byinshi cyane nifuzaga kuzakora mu mwaka wa 2015. Ariko nubwo nagiye bimwe mbikora hari ibindi byanze neza.

Kuri ubu, icyo maze gukora ni ugupangira umwaka wa 2016 nkazawukoramo ibyo ntabashije gukora muri 2015 turimo gusa naho turangiza nubwo utararangira”.

Christopher akomeza avuga ko ashimira abafana be uburyo bakomeje kumuba hafi mu bihe bishize, ndetse anabasaba gukomeza kumwereka ko bamushyigikiye mu bikorwa bye bya muzika.

[youtube url=”https://www.youtube.com/watch?v=DXxipGjedIY” width=”560″ height=”315″]

Joel Rutaganda

UM– USEKE.RW