Yarokotse Jenoside afite imyaka 4, ubutumwa bwe nyuma y’imyaka 20

Ubu ni umuhanzi ukomeye cyane mu Rwanda, ndetse no mu karere amaze kumenyekana. Mu myaka 20 ishize biramugoye cyane kugira icyo avuga ku byamubayeho muri icyo gihe, yari umwana muto cyane ataruzuza imyaka ine, ubutumwa atanga uyu munsi ni ubw’ubumwe bw’abanyarwanda no gukomera ku barokotse.

Butera Jeanne d’Arc, Knowless, mu gitondo cyo kuri uyu wa 10 Mata yakiriye umunyamakuru w’Umuseke mu rugo aho atuye, bagirana ikiganiro kigufi ku bihe u Rwanda rurimo uyu munsi.

Knowless yabuze benshi cyane mu muryango we muri Jenoside, birakomeye cyane kugira icyo mubiganiraho kubera ahagahinda kenshi no guhita asubira icyo gihe, birakomeye cyane kumufata amafoto mu gihe nk’icyo cy’agahinda, gusa nyuma yo gutuza twaganiriye bitari kuri we cyane.

Knowless yavutse tariki 01 Ukwakira 1990 mu Ntara y’Amajyepfo kimwe n’abandi bahanzi, mu gihe nk’iki cyo kwibuka Jenoside ibikorwa byabo bya muzika ntabwo biba ari byinshi, afata umwanya uhagije wo kuba ari mu rugo akajya no mu bindi bikorwa bijyanye no kwibuka.

Kuri we Jenoside ni ikintu kibi cyane cyabaye mu Rwanda kidakwiye kuzongera kuhaba ukundi.

Muri macye cyane, avuga ko nyuma ya Jenoside yagerageje kubaka ubuzima bwe kimwe n’abandi kubera uburyo bwo kubikora Leta yari yabahaye (Amahoro).

Avuga ku cyo agamije kugeraho mu buzima bwe, ati “ ni uko ejo hanjye hazaba neza, ejo bundi hakaba neza kurusha ejo hashize, icyo ngamije ni iterambere rirambye bitandukanye na cyera, nkora neza ibyo nkira kurushaho.”

Umuhanzi Knowless kuri we abahanzi ni ijisho rya rubanda, avuga ko byoroshye kuba umuturage yumva indirimbo agahita afata amagambo yayo, bityo ko bo nk’abahanzi bakwiye kugira uruhare rushya mu kubaka igihugu bakoresheje impano zabo.

Ati “Nk’abahanzi dukwiye gukora icyo aricyo cyose cyakumira Jenoside, n’aho tubibonye n’abafite imyumvire nk’iyo tugaashyira hamwe tukacyamagana duharanira ko bitazongera.”

Ubutumwa aha abanyarwanda

Mu magambo ye ati “Abarokotse bakomere, ibyabaye byarabaye ariko ntibizongera. Baharanire kubaho kandi kubaho neza kubera ko guhera mu bwigunge nta kintu byakubaka, ariko kureba imbere nibyo bikwiriye.

Ibi bihe iyo tubigezemo biba bikomeye kuri buri wese. Kuko kwibuka bituma umuntu yongera kumva nk’aho ibyo bintu byabayeho ejo.

Niba uziko ufite umuturanyi cyane cyane ukunda kugira ibikomere muri iki gihe cyo kwibuka ntumutererane, umusange, umuhumurize, umukomeze kuko nicyo abanyarwanda tubereyeho guhana icyizere no guharanira bitazongera.”

Photo/Plaisir Muzogeye

Joel RUTAGANDA
ububiko.umusekehost.com