Yanditse amateka yambuka isumo rya Niagara ku mugozi

Tariki 15/06/2012 Nick Wallenda yanditse amateka ubwo yabaga umuntu wa mbere mu myaka 100 ishize wambutse isumo rya Niagara muri Canada agendera ku mugozi.

Uyu mugabo yagenze uburebure bwa metero 548 ari ku butumburuke bwa metero 60 uvuye ku mazi, hejuru y’ibibuye uwakwituraho atarokoka.

Uwitwa Sam Patch yagerageje gukora bene ibi hejuru y’Isumo rya Niagara mu 1829, ariko aza gusimbuka atraangije agira n’amahirwe ntiyahasiga ubuzima, uyu niwe wahaye ikitegererezo Nick Wallenda wabikoze ejo bundi.

Wallenda w’imyaka 33 wavukiye muri Leta ya Florida uru rugendo rwa 548m ku mugozi rwamushyize mu mateka, yarukoze mu gihe cy’iminota 25 n’amasegonda 19 ku mugozi wa 5cm z’ubugari akoresheje kandi uruti rwamufashaga guhama hamwe (balance).

Wallenda ibyo yakoze si ibya none mu muryango we kuko hari bene wabo bagiye bagwa muri bene aya mashyengo. Mu 1978 sekuru Karl yitabye Imana ku myaka 73 imbere yaza Camera ubwo yageragezaga kwambukiranya ku mugizi za “Etages” ebyiri mu mujyi wa Puerto Rico kuri metero 37 uvuye hasi, maze umuyaga umusanga muri iyo mikino uramuhubura ntiyasamba.

Akimara kurangiza uru rugendo, Wallenda yagize ati: “ Ni ibi na sogokuru yageragezaga. Uyu muhigo nywutuye sogokuru akaba n’urugero rwanjye Karl Wallenda”

Ise wa Nick Wallenda witwa Terry Troffer yashimiye cyane umuhungu we ngo kuko ahesheje ishema umuryango we.

Abantu barenga 125 00 ku ruhande rwa Canada na 4000 ku ruhande rwa America aho iri sumo rigera bari bahuruye kureba igikorwa cy’uyu mugabo Nick.

Nick yahise ajya mu gitabo cya Guiness World Records ku kwambuka urugendo runini kandi hejuru ku mugozi.

Jean Paul Gashumba
UM– USEKE.COM