Week end ya Noheli mu muhanda yaranzwe n’ituze – Traffic Police

Ishami rishinzwe umutekano mu muhanda rya Police y’igihugu riratangaza ko muri week end ya Noheli nta mpanuka idasanzwe yayibayemo yahitanye ubuzima bw’abantu.

Supt Jean Marie Vianney Ndushabandi umuvugizi wa Police y’u Rwanda ishami rishinzwe umutekano mu muhanda yabwiye Umuseke ko muri rusange mu gihugu iyi week end yari ituje ku bigendanye n’umutekano wo mu muhanda.

Supt Ndushabandi ati “habayeho impanuka eshatu gusa zisa n’izikomeye. Imwe i Rusizi izindi ebyiri mu mujyi wa Kigali.”

Supt Ndushabandi avuga ko imwe muri izi mpanuka ngo bigaragara ko ifitanye isano n’ibirori bya Noheli kuko yari iy’umushoferi bigaragara ko ananiwe cyane.

Impanuka muri rusange zabaye muri week end ya Noheli ngo ni eshanu, zose hamwe ngo zahitanye abantu batanu barimo abana batatu, gusa izi mpanuka zahitanye ubuzima zikaba ngo ziri mu rwego rw’impanuka zisanzwe zidafite aho zihuriye n’iminsi mikuru ya Noheli.

Muri iyi week end ariko ko kandi ngo hafashwe abantu bane batwaye ibinyabiziga basinze nubwo bwose ngo nta mpanuka bateje.

Muri iki gihe cy’iminsi mikuru Police y’u Rwanda ishami ryo mu muhanda isaba abantu batwara ibinyabiziga kwirinda gutwara ibinyabiziga banyoye ibisindisha kugira ngo birinde impanuka zishobora guhitana ubuzima bw’abantu.

Jean Paul NKUNDINEZA
UM– USEKE.RW