Wai Yeka wahoze muri Musanze FC agiye kujya muri Sunrise

9 Nyakanga 2015 – Rutahizamu Wai Yeka wahoze mu ikipe ya Musanze FC wanatsinze ibitego byinshi mu mwaka wa shampiyona 2013/14  agiye kujya mu ikipe ya Sunrise nyuma yo kumugura ariko ntahite ayijyamo muri uyu mwaka w’imikino urangiye.

Amakuru yizewe Umuseke ukesha bamwe mu bayobozi b’ikipe ya Sunrise FC aravuga ko umukinnyi Wai Yeka wahoze mu ikipe ya Musanze FC akaza no kwigaragaza cyane atsinda ibitego byinshi muri shampiyona ngo yaba yarasabye kugaruka muri iyi kipe y’i Rwamagana.

Iyi kipe yari yatanze Miliyoni 9 z’amafaranga y’u Rwanda kuri uyu mukinnyi ukomoka muri Congo Kinshasa, ariko shampiyona ijya gutangira aburirwa irengero.

Umwe mu bayobozi utashatse ko izina rye ritangazwa avuga ko bashaka kubaka ikipe ya Sunrise FC  umwaka utaha wa shampiyona ikazaba ikomeye ku buryo izaba mu makipe ahatanira igikombe cya shampiyona.

Yagize ati “Uyu mwaka ushize kuri twe wari uwa mbere muri shampiyona kandi twitwaye neza, turifuza kugira ikipe ikomeye irwanira igikombe.”

Avuga ku bakinnyi bateganya kugura, yagarutse ku mukinnyi Wai Yeka wari waguzwe n’iyi kipe ariko akaza kuyitoroka avuga ko ubu bari mu biganiro ndetse umwaka utaha bishoboka cyane ko uyu mukinnyi azakinira iyi kipe.

Yagize ati “Uyu musore yaraduhamagaye adusaba imbabazi ndetse anasaba  ko yaza kudukinira kandi natwe turamukeneye ntakabuza ashobora kudukinira umwaka utaha.”

NKURUNZIZA Jean Paul
UM– USEKE.RW