Volleyball: Ikipe y’igihugu yerekeje muri Cameroun

Nyuma y’impinduka zabayeho kuko byari biteganyijwe ko ikipe y’igihugu yerekeza muri Cameroun ku italiki 20 Mata 2015, iyi kipe yahagurutse mu Rwanda kuri uyu wa  taliki 22 Mata 2015.

Ikipe y’u Rwanda igiye muri Cameroun mu rwego rwo kwitegura imikino y’akarere ka 5 mu gushaka itike y’imikino ya Afurika “All Africa Games 2015” nk’uko bitangazwa n’Imvaho Nshya.

Iyi kipe muri Cameroun ikaba igomba gukina imikino 3 ya gicuti nyuma ikagaruka mu Rwanda igakomeza imyitozo kugeza irushanwa ry’akarere ka 5 ritangiye taliki 01 kugeza 06 Gicurasi 2015.

Si ubwa mbere, ikipe y’u Rwanda igiye gukina na Cameroun  kuko  umwaka ushize ikipe y’u Rwanda yarayitsinze mu mikino yo gushaka itike y’igikombe cy’isi yari yabereye muri Cameroun.

Iyi mikino yabaye  kuva  taliki ya 12-17 Gashyantare 2014, ikipe y’u Rwanda yatsinze  Cameroun amaseti 3-1 (25-20, 25-20, 22-25 na 25-17) gusa byaje kurangira Cameroun ariyo ibonye itike yo guhagararira Afurika mu gikombe cy’isi. Ibi bihita byerekana ko ikipe ya Cameroun ikomeye ari nabyo byatumye umutoza w’ikipe y’u Rwanda Paul Bitok ahitamo iyi kipe mu rwego rwo kwitegura  zone 5. Ikipe ya Cameroun mu mikino ya Afurika  muri 2001 yatsinze u Rwanda amaseti 3-1 (25-20, 19-25, 25-20 na 25-18).

Imikino y’akarere ka 5, ikipe y’u Rwanda ifite akazi gakomeye ko kubona itike imbere ya Kenya isanzwe iyigora. Muri 2011, u Rwanda rwatsinze Kenya rubona itike y’imikino ya Afurika “All Africa Games 2011”, muri 2013 ikipe y’u Rwanda itsinda Kenya  ibona itike y’imikino  ya Afurika mu gushaka itike y’igikombe cy’isi.

Ubu hazitabira amakipe  5 ariyo u Rwanda, u Burundi, Kenya, Tanzania na Uganda. Ikipe ya mbere ikaba ariyo izabona itike y’imikino ya Afurika “All Africa Games 2015”. Indi mikino yo  mu itsinda rya kabiri izabera muri Ethiopia  kuva taliki 7 kugeza 11  Gicurasi 2015 ahazaba harimo Misiri, Ethiopia, Soudani, Eritrea na Somalia.

Abakinnyi barekeje muri cameroun

Tuyishime Eugene, Ndayisabye Silvestre, Mahoro Yvan, Karera Emile Dada, Mutabazi Bosco, Ndamukunda Flavier, Ntagengwa Olivier, Yakan Guma Lawrence, Mutabazi Yves, Murangwa Nelson, Kwizera Pierre Marchal, Mutoni Adolphe, Musoni Fred na Dusabimana Vincent.

UM– USEKE.RW