Volley Ball: RRA VC ngo yiteguye kuzavana i Tunis umwanya mwiza

Muri Shampiona  y’umukino wa Volley Ball mu bagore ikipe y’Ikigo cy’Imisoro n’Amahoro RRA VC kuri uyu wa kabiri nimugoroba irerekeza muri Tuniziya aho igiye kwitabira imikino nyafurika ihuza amakipe yabaye aya mbere iwayo. Ngo yiteguye kuzahaserukana ishema.

Iyi kipe yahigitse izindi muri shampiyona ya 2015 mu Rwanda, i Tunis izahasanga andi makipe 16 aturutse mu bindi bihugu bya Africa mu rwego rw’abagore. Iri rushanwa mpuzamahanga rizatangira tariki 22 Mata kugera ku ya 1 Gicurasi.

Jean Luc Ndayikengurukiye umutoza wa RRA VC avuga ko ikipe ye ihagaze neza ku buryo bimuha ikizere cyo kwitwara neza muri iyi mikino bagatahana umwanya mwiza kurusha uwo bajeho umwanka ushize.

Ndayikengurukiye ati “Muri iyi mikino nyafurika tugiye kugerageza kwitwara neza kuko tumaze igihe dutahana umwanya wa gatandatu, ubu dushaka ko tuzaza imbere tube mu ba mbere.”

Umwaka ushize ni RRA VC yasohokeye u Rwanda mu mikino nyafurika yabereye i Cairo mu Misiri. Icyo gihe RRA VC yatahanye umwanya wa gatandatu.

Muri 2012 nabwo niyo yari yaserukiye u Rwanda, mu mikino nyafurika yabereye i Nairobi muri Kenya, icyo gihe RRA VC yatahanye umwanya wa gatanu.

Ikipe ya Volley Ball y’abakobwa ya RRA yashinzwe muri 2008, yatangiye ari ikipe igizwe n’abakozi ijya muri shampionat, nyuma yaje kongerarwa imbaraga hiyongeramo abakinnyi bakiri bato, igiye kumara imyaka itatu yikurikiranya iyoboye urutonde rwa shampiyona muri Volley Ball.

****************