Valens Ndayisenga arashima cyane Team Rwanda

Valens Ndayisenga w’imyaka 22 wagize umwuga umukino wo gusiganwa ku magare avuga ko afite ishimwe rikomeye ku batangije umushinga wa Team Rwanda kuko yavuye kure ubu akaba hari aho ageze kandi hakiri aho yifuza kugera.

Ndayisengaubu akina nk’uwabigize umwuga muri Team Dimension Data for Qhubeka yo muri Afurika y’epfo, yitoreza mu Butaliyani.

Uyu musore uvuka mu karere ka Rwamagana, yashimiye cyane umuryango wa Jonathan Jock Boyer na Kimberly Coats Boyer, watangije umushinga wa Team Rwanda Initiative, ugateza imbere umukino w’amagare mu Rwanda, bigatuma u Rwanda rugira ikipe y’igihugu ikomeye.

Team Rwanda yafashije abanyarwanda batanu kubona amakipe yo hanze, ubu bakina nk’ababigize umwuga; Adrien Niyonshuti, Valens Ndayisenga na Uwizeyimana Bonaventure bakina muri Team Dimension Data, naho Hadi Janvier na Jean Bosco Nsengimana bakina muri Stradalli-Bike Aid yo mu Budage.

Valens Ndayisenga abinyujije ku rubuga rwa Instagram yagize ati: “Iyo ndebye aya mafoto, nkibuka aho natangiriye nkareba aho ndi ubu nkanatekereza ku hazaza hanjye, mbona impamvu zo gushimira mwe mwambaye iruhande, mwagize uruhare rukomeye mu iterambere ry’umukino w’amagare mu Rwanda.

Ndashimira cyane Kim na Joc  bashoye  imbaraga nyinshi mu mukino wo gusiganwa ku magare mu Rwanda, ntibagiwe na FERWACY. Ntimuzatakaze ikizere, ntuzafate umwanzuro wo kudusiga, kuko ntimuratugeza aho twifuza, gusa dukomeje kubashimira cyane.

Mbashimiye mbikuye ku mutima, ntibikwiye ko dutekereza kubyo twumva n’ibyo tubona ngo bitwibagize aho twavuye, n’aho tugeze. Muri byose ntimuzacike intege, Team Is Team”

Valens Ndayisenga arashimira cyane umuryango wa Jonathan Boyer (umunyamerika wa mbere wakinnye Tour de France) wageze mu Rwanda muri 2006 aje mu mushinga wo gutanga amagare ku bahinzi ba kawa mu Rwanda.

Ahageze, yabonye impano zikomeye z’umukino w’amagare, ahita atangira gushaka abafite impano, batangira imyitozo, bashing ikipe bayita Team Rwanda.

Muri 2012, Valens Ndayisenga wari umunyonzi i Rwamagana yaje kubonwaho impano, arategurwa, ashobora kwegukana isiganwa mpuzamahanga ‘Tour du Rwanda 2014’.

Roben NGABO
UM– USEKE.RW