Uwizeyimana yegukanye etape ya 5 ya Tropicale Amissa Bongo

Umunyarwanda Uwizeyimana Bonaventure yasize ibihangange atsindira etape ya gatanu (5) y’irushanwa ry’amagare ririmo kubera muri Gabon rizwi nka ‘Tropicale Amissa Bongo’.

Kuri iki cyiciro (etape) cya gatanu, abarushanwa basiganye mubyitwa ‘Sprint’, aho abasiganwa yirukanka yirukanka uko ashaka, hanyuma bakaza kubara igihe abarushanwa birukanse ibirometero baba bahawe kwiruka.

Abasiganwa bakoze urugendo ruva Lambarane kugera Kango rureshya n’ibilometero 143, Uwizeyimana Bonaventure ayegukana yanikiriye Umunya-Maroc Lahsani wamukurikiye.

Muri rusange abakinnyi batanu bitwaye neza kuri iyi etape ya gatanu ni Umunyarwanda Bonaventure Uwizeyimana (Rwa), Mouhssine Lahsaini (Maroc), Tim De Troyer (Beligique- Wanty – Groupe Gobert), Yohann Gene (France- Team Europcar) na Meron Teshome Hagos (Eritrea).

Tubibutse kandi ko n’ejo kuwa kane tariki 16 Mutarama, ubwo hirukankwaga etape ya kane ari nayo ndende muri iri rushanwa (190.4 km), umunyarwanda Valens Ndayisenga w’imyaka 19 yongeye kwerekana ko amaze kuba umukinnyi dore ko yaje gusoreza iyi etape ku mwanya wa munani (8), no ku mwanya wa kabiri mu batarengeje imyaka 23 ndetse no ku mwanya wa kane mu Banyafurika.

Ndayisenga Valens yatangaje ko yababajwe n’uburwayi yahuye nabwo bakigera muri Gabon, ari nabwo ngo bwatumye atitwara neza mu ma etape atatu ya mbere yabanje.

Nyuma ya etape ya kane, umunya-Espagne Sanchez Luis Leon niwe ugifite umwenda w’umuhondo ugaragaza umukinnyi uri imbere.

JD Nsengiyumva Inzaghi
ububiko.umusekehost.com