Uwamariya asigiye akahe kazi Guv. Kazayire mushya Iburasirazuba?

Rwamagana – Ku mugoroba wo kuri uyu wa mbere Odette Uwamariya yahererekanyije ububasha na Guverineri mushya w’Intara y’Intara y’Iburasirazuba Judith Kazayire. Odette Uwamariya yavuze bimwe mu byo asize akoze n’ibyo atarangije, abwira umusimbuye ko nta muntu n’umwe ushobora kugera ku ntego adakoranye neza n’abandi.

Intara y’Iburasirazuba yibasiwe cyane n’imihindagurikire y’ikirere yateye izuba rimaze hafi imyaka ibiri, ibi byavuyemo amapfa nayo yarumbije umusaruro w’ubuhinzi n’ubworozi mu bice bya Kirehe, Ngoma, Kayonza na Nyagatare, bitera abaturage gusonza. Iki ni kimwe mu bibazo Odette Uwamariya asize bagihanganye n’ingaruka zacyo, Ndetse Uwamariya yabwiye umusimbura ko azakomereza aho bari bageze bahangana nacyo.

Mu gihe cy’imyaka itanu, Iburasirazuba kandi hagiye haba ibibazo mu miyoborere y’abaturage ku nzego z’ibanze byatumye abayobozi bagenda begura bya hato na hato kugeza no ku rwego rwa ba Mayor. Mu kwesa imihigo ya 2015/16 uturere tw’Iburasirazuba twaje mu myanya yo hagati, akaje hafi ni Gatsibo yabaye iya 11, na Bugesera(12).

Mu ihererekanya bubasha hagarutswe cyane ku kibazo cy’izuba ryateye amapfa atera inzara no guhangana n’ingaruka zaryo, Odette Uwamariya wagizwe umunyabanga uhoraho muri Minisiteri y’Ubutegetsi bw’Igihugu yavuze ko mu gihangana n’iki kibazo bafashije abaturage bahabwa ibiribwa no mu guhangana nacyo mu buryo burambye bahaye abaturage 700 imashini zuhira imyaka.

Yabwiye umusimbura we ko iki kiri mu bibazo azakomereza aho bari bageze, yongeraho ariko ko “Nta muntu n’umwe ushobora kugera ku ntego adakoranye neza n’abandi.”

Judith Kazayire wari Vice Mayor w’Umujyi wa Kigali, yavuze ko aje gukomeza gushyira mu bikorwa gahunda z’igihugu zibanda cyane ku muturage.

Kazayire ati “”Nzanye ubushake n’imbaraga zanjye ngo dukomeze duteze imbere Intara yacu, icya mbere nzaheraho ni ukwegera abaturage dushyira imbaraga mu gukemura ibibazo bihari harimo n’imihindagurikire y’ikirere”

Avuga ko afite ikizere ko mu bufatanye n’abandi azusa ikivi uwo asimbuye asize.

Minisitiri w’Ubutegetsi bw’igihugu Francis Kaboneka wari muri uyu muhango nawe yakomoje ku kibazo cy’izuba, avuga ko bafashije abaturage guhangana nacyo ndetse n’abari basuhutse ubu ngo bagarutse.

Yasabye Guverineri mushya kutazasubiza inyuma ibyari byagezweho kandi agakomeza guhangana n’iki kibazo.

Muri uyu muhindo, kugeza ubu hashize ibyumweru bibiri nta mvuga Ibuaasirazuba baheruka nubwo mu minsi ishize yari yageze hasi abahinzi bagatera imyaka.

Elia BYUK– USENGE
UM– USEKE.RW