Uturere turimo abakene benshi….Nyamasheke niyo ibanza na 62%

*Abatuye Nyamasheke 62% ni abakene
*Utundi turere tune(4) dufite abakene cyane bari hejuru ya 20%
*Kicukiro niko karere gafite abakene bacye mu Rwanda, 16%

Ubwo hamurikwaga icyegeranyo ku mibereho y’Abanyarwanda yo kuva mu 2011 kugeza mu 2014, Akarere ka Nyamasheke kabanziriza utundi mu kugira umubare munini w’abakene n’abakennye cyane, Minisitiri w’Imari n’Igenamigambi Amb. Claver Gatete yavuze ko imibare igaragazwa ifasha mu gukemura ibibazo byagaragajwe.

Nk’uko byagaragajwe muri Raporo, muri rusange mu myaka itanu kuva mu 2011 kugeza mu 2014, umubare w’Abanyarwanda bakennye wavuye kuri 44,9% ugera kuri 39,1% mu gihe abafite ubukene bukabije (Extreme poverty) bavuye kuri 24,1% bagera kuri 16,3%.

Raporo y’Ikigo cy’Igihugu cy’Ibarurishamibare (NISR) yiswe ‘Integrated Household Living Conditions Survey (EICV) igaragaza ko mu Rwanda ibintu byinshi byahindutse mu buryo bwiza, haba ari mu musaruro w’ubuhinzi, mu ikoranabuhanga, ariko ikagaragaza ko hakiri byinshi byo gukora ngo Abanyarwanda bose bace ukubiri n’ubukene.

Ikigo cy’Igihugu cy’Ibarurishamibare kigaragaza ko umubare w’abakene wavuye kuri 58,9% mu 2000/01 ugera kuri 56,7% mu mwaka wa 2005/06 icyo gihe umubare w’abakene cyane (extremely poor people) wavuye kuri 40,0% mu mwaka wa 2000/01 ugera kuri 35,8% mu 2005/06.

Akarere ka Nyamasheke niko gafite abakene benshi mu gihugu, aho muri rusange 62,0% mu batuye aka karere ari abakene, muri bo abagera kuri 39,2% ni abakene cyane.

Uturere twa Gicumbi, Gisagara, Rutsiro, Burera natwo ntiduhagaze neza kuko usanga abakene muri utwo turere barengeje 50%. Uretse Gisagara ifite abakennye cyane bagera kuri 20,6%, utundi turere muri utwo abakennye cyane bagera kuri 23%.

Uturere two mu mujyi wa Kigali nitwo tugaragaramo abakene bake ugereranyije, Gasabo ifite 23,4%, muri bo 11,3% barakennye cyane. Nyarugenge ifite abakene 19,9% muri bo abakennye cyane ni 8,4% mu gihe Kicukiro ifite abakene 16,3% muri bo 6,5% nibo bakennye cyane.

Utundi turere dukanyakanya mu kugira abakene bacye ugereranyije harimo Musanze, Bugesera, Huye, Muhanga, Kayonza, Kamonyi, na Rwamagana.

Minisitiri w’Imari n’Igenamigambi Amb. Gatete Claver yavuze ko mu rwego rwo kwihutisha iterambere hariho ingamba zo kongera imijyi yunganira Kigali.

Yavuze ko uko imibare ihagaze, byerekana ko hari ikizere cy’impinduka ngo ukurikije uko ibintu byari byifashe nyuma ya Jenoside yakorewe Abatutsi, aho Abanyarwanda benshi cyane bari abakene bikomeye.

Imibare y’iki cyegeranyo igaragaza ko mu kuboneza imbyaro, Umunyarwandakazi yageze ku bana 4,2 mu 2013/14 avuye kuri 6,1 mu 2005, ndetse ngo bateganya ko bazaba ari abana 3,6 muri 2014/15.

Nubwo u Rwanda rwageze ku Ntego z’Ikinyagihumbi, (MDGs) ku kigero kiza,  igihugu ngo kiracyahanganye n’umubare munini w’abana bagwingiye kubera indyo mbi, imibare igaragaza ko abana 38% bari munsi y’imyaka itanu bafite ikibazo cyo kugwingira mu gihe 2% batakaza ibiro kubera indyo mbi.

Perezida Kagame yagarutse kuri iki kibazo, asaba ko cyakemurwa mu maguru mashya n’inzego zose kireba.

Ati “Mu kinyabupfura ndababuriye, iki kibazo abagishinzwe kirangire vuba. Ubuhinzi bwarazamutse, girinka yagenze neza, mu cyaro inkoko zirahari, imboga ni uko, ikibura ni ukubishyira ku isahani gusa.”

Mu kiganiro n’Abanyamakuru, Minisitiri Gatete Claver, yavuze ko imibare yagaragajwe n’iki cyegeranyo izafasha mu igenamigambi ry’ubutaha, ko ubu bagiye kohereza itsinda risesengure ahagaragaye ibibazo, kugira ngo bizibandweho mu gukemurwa ubutaha.

Ange Eric HATANGIMANA
UM– USEKE.RW