USA: Ururimi rushobora gutuma Beatrice Munyenyezi atsinda urubanza rwe

Manchester – Impungenge niba ibibazo, ubuhamya n’inzandiko byarahinduwe neza mu ndimi biri gutuma urubanza rwa Beatrice Munyenyezi ukekwaho uruhare muri Genocide rujya mu ruhande rwe nkuko byemejwe n’umwe mu bacamanza 12 baruburanisha.

Beatrice akurikiranyweho uruhare muri Genocide yakorewe abatutsi mu Rwanda, ndetse arakekwaho kwinjira muri USA mu 1998 mu buryo bunyuranyije n’amategeko. Ibi byombi akaba abiburana bitandukanye.

Uyu mucamanza, wambere wavuze ibibera muri ruriya rubanza ariko akanga gutangaza amazina ye, yavuze ko abacamanza bagenzi be 11 bashinzwe urubanza rw’uriya mugore, bafite gushidikanya kwinshi niba koko uriya mugore yaba yaragize uruhare mu bwicanyi.

“Nta numwe muri twe wizeye neza ko abatangabuhamya (bavuye mu Rwanda) bumvise neza ibibazo babajijwe n’abanyamategeko, byavanwaga mu cyongereza bishyirwa mu Kinyarwanda, ndetse n’ibisubizo byabo byavaga mu Kinyarwanda bigarurwa mu rurimi rwacu. Habayeho kongera gusuzuma habazwa n’abandi bantu bumva ikinyarwanda n’icyongereza ariko ntibihure ” byatangajwe n’uriya mucamanza.

Uyu mucamanza yavuze ko bitatunguranye ko urukiko rwanga ikifuzo cya Leta ya New Hampshire cyo kugumana Munyenyezi  mu munyururu, kuko ngo kugeza ubu abacamanza  batarabona uruhare rwe muri Genocide yakorewe Abatutsi.

Uyu mucamanza ati: “ Ntidushyigikiye ibyo akekwaho (Genocide) ndetse umugabo we (Sharom Ntahobari) na nyirabukwe (Paulina Nyiramasuhuko) byarabahamye, ariko we ntacyo turabona kimuhama kugeza magingo aya, kumvikana mu rurimi ni kimwe mu mbogamizi zihari”

Umucamanza mu gace ka Concord (New Hampshire) yanzuye ko Munyenyezi Beatrice arekurwa tariki 12 Mata, nubwo habayeho guterana amagambo hagati y’uyu mucamanza wategetse ko arekurwa na Steven McAuliffe  uhagarariye Leta mu manza muri kariya gace.

Beatrice Munyanyezi yari mu munyururu kuva mukwa 6/2010.

Mu ntangiro z’uyu mwaka, abatangabuhamya bagera kuri bane, bahagurutse mu karere ka Huye  mu ibanga rikomeye bajya gushinja Munyenyezi i New Hampshire.

Munyenyezi Beatrice wari i Butare mu gihe cya Genocide, akekwaho gutanga amazina y’abagombaga kwicwa muri Kaminuza nkuru y’u Rwanda i Butare, aho yari umunyeshuri.

Akekwaho kandi kwaka indangamuntu kuri  ‘bariyeri’, gutegeka abagabo n’abasore gufata abagombaga kwicwa ku ngufu, ibi ngo yabikoreye  imbere ya Hotel Ihuriro  hafi yaho yari atuyen’umugabo we Ntahobali hitwa “Kumukoni”.

Jean Paul Gashumba
UM– USEKE.COM