Urukiko rwa ICC rwanzuye ko William Ruto nta cyaha akwiye kuryozwa

Kuri uyu wa kabiri, Urukiko mpuzamahanga mpanabyaha rukorera i La Haye mu Buholandi rwategetse kuri uyu wa mbere ko rusanze Visi Perezida wa Kenya William Ruto n’umunyamakuru Joshua Sang nta byaha byaha bakwiye kwireguraho bityo rurangiza urubanza rwabo.

Ni inkuru yari itegerejwe na benshi muri Kenya, barimo abashinjaga aba bagabo kuba inyuma y’ubwicanyi bukomeye n’urugomo byakurikiye amatora yo mu 2007 bwaguyemo abantu bagera ku 1 200.

Mu kwezi kwa kabiri uru rukiko rwatesheje agaciro ubuhamya bwo kwisubiraho kubyo bari bavuze bwatanzwe n’abashinjaga aba baregwa mbere bari batanze ubuhamya babashinja, Urukiko ruvuga ko ubwo buhamya butari bucyongeye kwifashishwa n’abatangabuhamya.

Abatangabuhamya benshi bo ku ruhande rwashinjaga Visi Perezida wa Kenya William Ruto bisubiye ku ijambo bahundira imvugo yabo, ubushinjacyaha bwavuze ko ari ukubera iterabwoba na ruswa.

Gusa ibi byatumye abunganira abaregwa basaba ko Urukiko rureka uru rubanza kuko ibyaha baregwa ntabiriho nta n’abo kubihamya bahari.

Fatou Bensouda umushinjacyaha w’uru rukiko rwa ICC yavuze ko kwisubira kwa bariya bashinjaga abaregwa byaciye intege urubanza rwose rwaregwagamo uriya mugabo ukomeye bigatuma no gukomeza urubanza bigorana kubera ibimenyetso bicye.

Kuri uyu wa kabiri, abazamanza banzuye ko nta byaha babona byatuma aba bagabo bakomeza gukurikiranwa banzura ko urubanza rwabo rurangiye.

Mu 2014, nka gutya kandi ubushinjacyaha bwa ICC bwaretse ibyo bwari bukurikiranyeho Perezida wa Kenya Uhuru Kenyatta kuko abatangabuhamya ngo batewe ubwo abandi bagahabwa ruswa bakisubira kubyo bavuze.

Perezida Kenyatta na Visi Perezida William Ruto bari mu bice bishyamiranye mu matora ya 2007 ariko baza kwishyira hamwe batsinda amatora mu 2013.

UM– USEKE.RW