Uruganda runini rwatangiye gutanga amashanyarazi akomoka ku Izuba mu Rwanda

Umushinga munini cyane w’ingufu z’imirasire y’izuba mu karere ka Afurika y’Iburasirazuba watangiye kubyara amashanyarazi, bateri nini cyane zifata imirasire y’izuba zikayibyazamo amashanyarazi, ziri ku buso bwa ha 21 mu mudugudu w’Agahozo Shalom mu Burasirazuba bw’u Rwanda.

U Rwanda rusingiriye igihugu cy’Afurika y’Epfo kuva mu kwezi gushize, kuza ku isonga mu bihugu by’Afurika yo munsi y’Ubutayu bwa Sahara byashoboye ku byaza umusaruro imirasire y’izuba ku buryo bufatika.

Ubu buryo bwo kubyaza amashanyarazi imirasire y’izuba bwubatswe mu mudugudu wa Agahozo Shalom, mu karere ka Rwamagana, nibura bukazashobora gutanga amashanyarazi angana na megawatts 8,5 ni ukuvuga 7% by’amashanyarazi u Rwanda rukoresha.

Ni bateri nini cyane (panneaux photovoltaïques) ibihumbi 28 zashyizwe ahantu hangana ha 21 mu mudugudu w’Agahozo Shalom, ibikorwa byose n’ibikoresho byatwaye akayabo ka miliyoni 24 z’Amadolari.

Leta y’u Rwanda yasinye amasezerano yo kuzagura urwo (ruganda rubyaza imirasire y’izuba mo amashanyarazi) ikazarwegukana nyuma y’imyaka 25.

Uko ingufu z’amashanyarazi zikomoka ku zuba zigenda ziyongera, leta y’u Rwanda ivuga ko ishaka kugera ku 10% by’amashanyarazi akaba akomoka ku ngufu z’izuba, bikaba bizafasha kugabanya igiciro cy’amavuta (mazout, cyangwa ibikomoka kuri pétrole) igihugu gikoresha mu mashini zifasha ingomero gutanga amashanyarazi.

U Rwanda si igihugu kirangwama izuba igihe cyose, ariko kigeramo imirasire y’izuba ihagije ku buryo yakwifashishwa mu kunganira ubundi buryo buriho bwo gushaka amashanyarazi.

Dan Klinck, ufite mu biganza sosiyeti ‘Afritech’ yubatse urwo ruganda avuga ko kubyaza izuba ingufu z’amashanyarazi bidatwara igihe kinini nko kubaka urugomero. Avuga ko kubaka uruganda rw’amashanarazi rushingiye kuri bateri zifata imirasire y’izuba, bitwara amezi igihe cy’amezi atandatu gusa mu gihe urugomero rutakubakwa mu gihe kiri hasi y’imyaka ibiri.

Abaturage bari batuye ahashyizwe izo bateri, bavuga ko bishimiye ko bahawe ingurane z’ubutaka bwabo kandi bakaba baranatangiye gukoresha ayo mashanyarazi.

Gusa abandi baturage batuye mu byaro bagomba gutegereza igihe kugira ngo ayo mashanyarazi aturutse ku mirasire y’izuba, ahuzwe n’indi miyoboro y’amashanyarazi isanzweho mu gihugu.

Hari isosiyeti yo mu Budage yitwa Mobisol, ifite uburyo bwo gufasha abaturage mu byaro gukoresha amashanyarazi bifashishije bateri zifata imirasire y’izuba. Ayo mashanyarazi akaba yabafasha gucana amatara, gushyira umuriro muri telefoni, gucomeka radio, aho umuturage yishyura amadolari y’America 10 buri kwezi mu gihe cy’imyaka itatu.

David Gasirabo ushinzwe imenyekanisha muri iyo sosiyeti Mobisol, avuga ko ingo 80% mu Rwanda byoroshye ko zakoresha ubwo buryo.

Umuyobozi wa Mobisol, Klaus Maier, avuga ko ikibazo bateri zishobora kugira ari uko zishobora kwangirika zikaba zatanga umuriro muke ku wo zari zisanzwe zitanga.

U Rwanda ruheruka gusinya amasezerano n’amasosiyeti azubaka urundi ruganda runini rw’amashanyarazi akomoka ku mirasire y’izuba, rukazubakwa mu karere ka Kayonza, aho akayabo ka miliyoni 30 z’amadolari (arasaga miliyari 20 z’amafaranga y’u Rwanda), rukazaba rwatangiye kubyara umusaruro mu gihe cy’amezi 21.

VOA

UM– USEKE.RW