Urubyiruko rurahamagarirwa gukoresha neza imbuga nkoranyambaga

Mu gikorwa cyo guha abahuzabikorwa b’urubyiruko ku rwego rw’akarere telefoni zigendanwa zigezweho (smart phones), Umunyabanga Nshingwabikorwa w’Inama y’Igihugu y’Urubyiruko, Nkuranga Alphonse yasabye urubyiruko gukoresha neza imbuga nkoranyambaga mu buryo butanga umusaruro.

Izi telefoni zatanzwe n’Umuryango w’Abanyakanada ukorera mu Rwanda, DOT Rwanda zigera kuri 31, zikaba zagenewe abahuzabikorwa b’Inama y’Igihugu y’Urubyiruko kuri buri karere ndetse n’Umuhuzabikorwa ku rwego rw’igihugu kuri uyu wa gatanu tariki ya 28 Werurwe 2014.

Nkuranga Alphonse, Umunyamabanga Nshingwabikorwa w’Inama y’Igihugu y’Urubyiruko yavuze ko hari hasanzweho imbogamizi mu gusangira amakuru hagati y’abahuzabikorwa n’Inama y’Igihugu y’Urubyiruko, izi telefoni zikaba zije nk’igisubizo.

Kuba izi telefone zifite ikoranabuhanga rya Internet by’umwihariko ryorohereza abazifite gukoresha imbuga nkoranyambaga nka Facebook, Twitter, BBM, WhatsApp, Youtube n’izindi abazihawe n’urubyiruko ruzifita rurasabwa kuzikoresha mu buryo butanga umusaruro.

Nkuranga yagize ati “Urubyiruko rugomba gukoresha imbuga nkoranyambaga neza, mu buryo butari ubwo kwishimisha gusa, ahubwo butanga umusaruro.”

Hari abamara umwanya munini bakoresha izo mbuga nkoranyambaga bikaba nko gukoresha nabi igihe, Nkuranga akaba avuga ko uko gukoresha imbuga nkoranyambaga byasubiza inyuma urubyiruko.

Yongeyeho ati “Hari abayijyaho bakayihoraho ugasanga ntacyo bakoze kandi hari ibyo bangije, ibyo ntitubyifuza turashaka ko  imbuga nkoranyambaga zifasha urubyiruko kongera umusaruro kuko  zitabaye izo gikoreshwa ibyo, byaba ahubwo ari ukubasubiza inyuma.”

Inama y’igihugu y’Urubyiruko yatangiye igikorwa cyo guhugura urubyiruko 2000 mu bijyanye no kwihangira imirimo rukoresheje ikoranabuhanga, aya mahugurwa akazagera muri Kaminuza no ku rundi rubyiruko bityo ngo bakaba banigishwa gukoresha neza imbuga nkoranyambaga mu buryo bubyara umusaruro.

Nzeyimana Emmanuel, umuhuzabikorwa w’Umuryango DOT Rwanda yavuze ko telefone batanze ku bahuzabikorwa b’urubyiruko mu turere twose tw’igihugu zigiye kubafasha gusangira amakuru akanewe ajyanye n’ibikorwa biteza imbere urubyiruko bikenewe gukorwa.

Naho Musirikare David, akaba umuhuzabikorwa w’Inama y’Igihugu y’Urubyiruko ku rwego rw’akarere ka Gasabo, yabwiye Umuseke ko yishimiye telefoni yahawe kandi avuga ko igiye kumufasha kunoza neza inshingano yarasanzwe afite.

Abahuzabikorwa b’urubyiruko mu turere n’abakozi b’Inama y’Igihugu y’Urubyiruko banahawe amahugurwa ku bijyanye no gukoresha imbuga nkoranyambaga, amasomo yatanzwe na Yesashimwe Samuel.

Babwiwe ko bagomba gushishikariza urubyiruko gukoresha imbuga nkoranyambaga nk’umuyoboro wihutisha kubona amakuru, ariko asaba ko bagomba kwitondera gutangaza amakuru yabo yose igihe bari kuri izo mbuga nkoranyambaga kuko hari abazihisha inyuma bakaba bakora ibikorwa bibi.

Mu byo abakoresha imbuga nkoranyambaga bagomba kwitondera gutangaza, ni nka nomero ya telefoni, nomero z’amakonti babitsaho ndetse no kubwira buri wese aho ugiye n’igihe uzahamara.

DOT Rwanda ni umuryango ufatanya n’Inama y’Igihugu y’Urubyiruko mu bikorwa binyuranye byo kubaka ubushobozi bw’urubyiruko, haba mu mahugurwa no kwigisha imyuga inyuranye.

HATANGIMANA Ange Eric
ububiko.umusekehost.com