Urashaka gusimbura Julles Karisa? Dore ibisabwa

Iri ni itangazo rya FERWAFA rihamagara  abifuza kuba bafata umwanya w’Umunyamabanga Mukuru wa FERWAFA, bagasimbura Julles Kalisa weguye.

FERWAFA iramenyesha ababyifuza ko ishaka gutanga akazi ku mwanya w’Umunyamabanga Mukuru Uhoraho. Abifuza uwo mwanya bagomba kuba bujuje ibi bikurikira:

• Kuba ari Umunyarwanda,
• Kuba byibura afite imyaka mirongo itatu y’amavuko,
• Kuba afite byibura impamyabushobozi y’icyiciro cya kabiri cya kaminuza,
• Kuba yarakoze ibijyanye n’ubuyobozi bwa Administration ya Siporo muri rusange, mu mupira w’amaguru bikaba akarusho,
• Kuba ari inyangamugayo mu mico no mu myifatire, atarafunzwe kubera kunyereza umutungo wa Leta n’ibindi byaha bikomeye (bigaragazwa na casier judiciaire),
• Kuba nta kibazo kijyanye n’ubuyobozi, umutungo cyangwa tekinike yaba yaragiranye na FERWAFA,
• Gutanga inyandiko byibura z’abantu babiri bamuzi, bemeza ubuhanga n’ubudakemwa mu kuyobora amashyirahamwe ya siporo.

Akazi ashinzwe:

• Gushyira mu bikorwa ibyemejwe n’Inama Rusange y’abanyamuryango ndetse na Komite Nyobozi,
• Kujya mu Inama Rusange n’iza Komite Nyobozi zose,
• Gutegura inama zose zaba iz’abanyamuryango, iza Komite Nyobozi, n’iz’amakomisiyo agize FERWAFA,
• Gukora inyandikomvugo y’izo nama,
• Gukurikirana inyandiko za FERWAFA,
• Gutsura umubano n’abanyamuryango, abagize amakomisiyo, FIFA, CAF n’abandi baterankunga,
• Kuyobora Ubunyamabanga Bukuru.

Ibisabwa byose, birimo ibaruwa isaba akazi, amakopi yemewe (certifiée), n’umwirondoro, musabwe kuba mwabigejeje ku biro bya FERWAFA bitarenze itariki ya 27/10/2011 saa kumi n’imwe (17h00’). Uwandikirwa ni Bwana Raoul Gisanura Ngenzi, Visi Perezida wa FERWAFA.

 FERWAFA