Umuvunyi na Polisi bari gusuzumwa

Kuri uyu wa kabiri impuguke z’umuryango mpuzamahanga ushinzwe kurwanya ruswa (UNCAC na UNODC) zatangiye igikorwa cyo gusuzuma imikorere y’urwego rw’umuvunyi n’izindi nzego za leta zifite aho zihuriye na Ruswa nka Polisi y’igihugu.

Izi mpuguke zageze i Kigali kuri uyu wa mbere, zikazamara iminsi 5 zireba niba koko Urwego rw’umuvunyi, Polisi, urukiko rw’ikirenga, societe civil ndetse n’itangazamakuru zubahiriza amasezerano yasinywe n’u Rwanda yo kurwanya ruswa.

Aya masezerano yemerera izi mpuguke kuza gukora igenzura niba izi nzego zikumira, zirwanya kandi zikanahana ruswa n’abanyereza umutungo w’igihugu,  nkuko amasezerano yasinywe n’u Rwanda mu 2003 muri Mexique abisaba.

Ushinzwe gukumira no kurwanya ruswa mu rwego rw’umuvunyi Augustin Nzindukiyimana  yatangarije umuseke.com ko izi mpuguke nta kabuza zizasanga u Rwanda rwarageze kuri byinshi mu kurwanya ruswa mu gihugu.

Augustin avuga ko bumwe mu buryo bugaragara bwo kurwanya ruswa ari comite zishinzwe gutanga amasoko zituma iki gikorwa kiba mu mucyo.

Izi mpuguke zije zivuye mu igenzura muri LIBAN na SENEGAL.

Izi mpuguke zikaba zije mu gihe hamwe na hamwe cyane cyane mu nzego zo hasi hari abinubira ruswa zisabwa ngo hagire ikibakorerwa nyamara cyari uburenganzira bwabo.

Daddy  Sadiki Rubangura

Umuseke.com