Umutoza wa Espoir BBC yeguye ngo kuko abayobozi bivanga mu kazi ke

Jean Bahufite watozaga ikipe ya Espoir Basketball Club kuri uyu wa gatatu yatangaje ko yasezeye ku mirimo ye. Bahufite ariko we akavuga ko yasezeye kubera ibyo atumvikanaho n’aba bayobozi.

Bahufite yafashije Espoir BBC gutwara ibikombe bine bya shampionat kuva mu 2012 ndetse ni nayo kipe ifite igikombe cya shampionat giheruka.

Bahufite yabwiye Umuseke ko igihe cyari kigeze ngo asezere muri Espoir BBC kubera abayobozi bamwivangira mu kazi kandi ntibamuhe ibyo bamugomba.

Bahufite ati “ Natandukanye nabo, hari ibyo tutumvikanye n’abayobozi. Nta bwisanzure nabonaga, nabonaga abantu benshi ku ntebe y’abatoza, abenshi bakaza tutabyumvikanye n’ubuyobozi bw’iyi kipe.”

Bahufite avuga ko yari amaze amezi atandatu adahabwa icyo we yise transport n’amafaranga ya communication, cyane ko ngo yatozaga Espoir nko kwitanga nta mushahara uhoraho yabonaga.

Umuseke wagerageje kuvugana na Fidele Rutagarama uyobora Espoir BBC ariko kugeza ubu ntibirashoboka.

Bahufite ni umwe mu batoza ba Basketball mu Rwanda ufite imihigo myinshi, yegukanye ibikombe bigera kuri bine bya shampionat, kimwe cya FIBA Africa Zone V Championship yatwaye mu 2012 akanagera ku mukino wa nyuma mu 2013.

Photos/Umuseke
UM– USEKE.RW