Umutoza wa APR FC yaba yasezeye

Andreas Spier wari mu bihano by’ikipe ye nyuma y’imyitarire mibi ku mukino wabahuje na AS Kigali muri week end ya tariki ya mbere Gashyantare, ubu biravugwa ko yamaze gusezera kuri iyi kipe y’ingabo.

Andreas yohereje ubutumwa bugufi kuri Radio Isango Star bugira buti “Nishimiye cyane kuba maze imyaka 7 muri ruhago nyarwanda, nahagiriye ibihe byiza. Nsize ikipe y’abakinnyi bakiri bato bigishijwe neza, ubu bakaba bari ku mwanya wa mbere. Ndifuriza APR FC amahirwe masa”.

Hari amakuru avuga kandi ko uyu mutoza hari ibaruwa yandikiye ubuyobozi bwa APR FC ariko ntisomwe bakayimusubiza kuko ngo atayizane aho ikipe ikorera.

Uyu mutoza yakunze kugarukwaho kenshi kubera imyitwarire ye ku kibuga irimo kugaragaza amahane cyane.

Abamuzi bemeza ariko ko ari umwe mu batoza b’abahanga cyane bazi gutoza abana baciye mu Rwanda.

Andreas wari waranashatse mu Rwanda, aheruka gutoza umukino wa APR FC yanganyijemo na AS Kigali ariko nyuma yawo agahagarikwa imikino itanu kubera kwitwara nabi ku byemezo by’umusifuzi wamusohoye ku kibuga.

Mu myaka irindwi amaze mu Rwanda, yatojeho ikipe y’igihugu y’abagore, ajya muri Academy ya APR FC gutoza abana, yavuye muri APR y’abana yinjira mu gutoza ikipe nkuru ya APR FC guhera muriwe Werurwe 2013.

ububiko.umusekehost.com