Umuryango wa Patrice Lumumba mu nkiko ngo umenye ukuri

François Lumumba, umuhungu w’uwahoze ari minisitiri w’intebe muri Congo ikitwa Zaire, Patrice Emery Lumumba mumpera z’iki cyumweru nibwo yagiye mu rukiko kubonana n’umucamanza i Bruxelles. Ikirego cy’uwo muryango wa Lumumba kirimo ababiligi 10 bakekwa kuba bari inyuma y’urupfu rwa Lumumba wishwe mu 1961.

Gutanga icyo kirego, umuryango wa nyakwigendere ukaba ufite ikizere cyo kubona impapuro nyinshi zibitse ariko zitemererwa kujya ahagaragara kuko zahamya benshi urupfu rwa Lumumba.

Patrice Lumumba yabaye Minisitiri w’Intebe wa mbere binyuze mu matora mu 1960 muri Gicurasi.
Yaje gufatwa muri Nzeri 1960 biturutse kuri coup d’Etat yari ikozwe na Joseph Mobutu. Muri Mutarama 1961, Lumumba yaje gukurwa aho yari afungiye, maze nyuma yo gukorerwa ibikorwa by’agashinyaguro bibi cyane, aricwa.

Mu 2002, nyuma y’icukumburwa ryakozwe n’abadepite, Leta y’Ububiligi yemeye ko yagize uruhare mu rupfu rwa Patrice Lumumba.

Nyamara ariko ku muryango wa nyakwigendera uko kwemera uruhare gusa ntibihagije. Uwo muryango urifuza ko ubutabera bwahana buri wese wagize uruhare mu rupfu rwa Lumumba ku giti cye ndetse ugahabwa indishyi kuri ubwo buhemu bw’ababiligi.

Ikirego gikubiyemo ibirego by’ibyaha by’intambara n’ibyibasira inyoko muntu, bityo nk’uko bisobanurwa na Me Christophe Marchand, umwunganizi mu by’amategeko w’umuryango wa Lumumba ngo ikirego nka kiriya ntikijya kigizwayo.

Ese Urwanda rwabonye ibivuga ku rupfu rw’umwami Rudahigwa ?

HATANGIMANA Ange Eric

Umuseke.com