UmunyaSudan wahoze ari ‘Bodyguard’ wa Bin Laden yagarutse mu iterabwoba

Ibrahim al Qosi w’imyaka 55 ni umunyaSudan wahoze ari umurinzi wa Osama Bin Laden, ubu nawe atangiye kuba icyamamare kubera za Video ashyira hanze ahamagarira urubyiruko kujya mu ntambara yita Jihad ku ruhande rwa Al Qaeda muri Yemen kurwanya Arabia Saoudite.

Iheruka yayisohoye tariki 06/02/2016 aho al Qosi yiyama cyane ubwami bwa Arabia Soudite agahamagarira urubyiruko rw’Abasilamu kumanuka muri Yemen kuburwanya aho ngo ubu bwami bushaka gusenya Yemen nk’uko bitangazwa n’ikinyamakuru Long War Journal.

al Qosi yafashwe mu Ukuboza 2001 muri Afghanistan, hari nyuma gato y’ibitero byo kuwa 9/11/2001 ku nyubako za World Trade Center i New York, ahita ajya gufungirwa muri gereza y’Abanyamerika ya Guatanamo muri Cuba yari imaze nayo gufungurwa.

Mu 2010 uyu mugabo yemeye ubufatanyacyaha mu guha ibikoresho Al Qaeda, maze hashize imyaka ibiri ararekurwa yoherezwa iwabo muri Sudan, aho ngo yagombaga kujya kuba umushoferi wa Taxi Voiture i Khartoum.

Gusa ngo umwaka ushize ubwo yari atangiye kugaragara muri Video za Al Qaeda byahise bigaragara ko adashaka kubaho mu mahoro, kuko aba ahamagarira urubyiruko kujya mu ntambara ku ruhande rwa Al Qaeda.

Muri video iheruka, uyu mugabo avuga ko icyemezo Arabia Saoudite yafashe mu kwezi kwa mbere cyo kwicira hamwe abantu 47 bashinjwa iterabwoba aribyo bituma Al Qaeda nayo izakomeza kuyirwanya.

Al Qaeda yatangiye gushyamirana na Arabia Saoudite mu 1990 ubwo iki gihugu cyemereraga ingabo za Amerika kuza kuba mu gihugu cyabo ngo kibashe kuba mu ntambara yo mu kigobe cya Perse.

Bin Laden ubwe akiriho nibwo ibi yabifashe nko kuba Amerika yarafashe ubutaka bwera (bwa Saoudi Arabia) maze atangaza intambara yeruye kuri Amerika, kuko ngo atari kurwana na Arabia cyane ko ngo byari guteza icyo ni iki mu basilamu ku isi bafata hariya nk’ubutaka butagatifu.

Al Qosi kuva mu 1990 yinjiye muri Al Qaeda azamurwa mu ntera mu 1994 yisanga ari mu ba hafi cyane bashinzwe umutekano wa Osma Bin Laden gusa nyuma y’urupfu rw’uyu, uyu munyaSudan yisanze muri gereza nshya ya Guatanamo ahavugwa iyicarubozo rya rurangiza.

Iyi gereza n’ubu ikaba igikora nubwo bwose Perezida Obama yiyamamaza yavugaga ko iyi gereza iri mu bya mbere azafunga.

Uyu mugabo wayifungiwemo akaba ubu nawe yagarutse mu bikorwa by’ubuhezanguni yahozemo we na shebuja Bin Laden.

UM– USEKE.RW