UmunyaKenya yashatse gutoroka Gereza ya Kigali ahita afatwa

Ahagana saa sita z’amanywa kuri uyu wa kabiri ku rukiko rwisumbuye rwa Nyarugenge umugororwa witwa Germain Mola ukomoka muri Kenya yari yaje kuburana maze agerageza gutoroka avanamo imyenda y’abagororwa akambara iy’abadafunze ariko ahita afatwa akigerageza gusohoka ahakorera urukiko nk’uko bitangazwa n’ubuvugizi bw’urwego rw’amagereza mu Rwanda, RCS.

Germain Mola ufungiye icyaha cyo gucuruza abantu (human trafficking) yari aje kuburana ariko ngo ishuti ye y’umukobwa witwa Awazi, mu gisa n’umugambi bari banogeje, yari yamuzaniye imyambaro isanzwe iyishyira muri toilets y’Urukiko aho yagombaga kuza agahindura ubundi agasohoka yambaye bisanzwe agacika.

Urwego rushinzwe iperereza muri RCS ngo rwari rufite amakuru ko hari abagororwa bashobora gutoroka ku munsi w’iburanisha kuko baba baje ari benshi bityo rukaza umutekano no gucunga abagororwa baje kuburana.

Uyu mugabo wari umaze ukwezi kumwe afungiye mu Rwanda, ubushinjacyaha bwari bumaze kumusabira igihano cyo gufungwa imyaka irindwi ku cyaha akurikiranweho cyo kuza mu Rwanda gutwara umuntu ugiye kugurishwa mu mahanga, we akabonamo indonke ya 3 000$.

Ubuvugizi bw’urwego rushinzwe imfungwa n’abagororwa buvuga ko uyu mugambi utagezweho kuko uyu mugororwa yaje gusohoka urubanza rutarangiye ajya muri toilet kunoza umugambi ariko asohotse yambaye indi myenda abacungagereza baramutahura bahita bamuta muri yombi nanone.

Uyu mukobwa ukekwaho umugambi wo gufasha umugororwa gutoroka nawe wahise ufatwa yabwiye Umuseke ko iyi myenda yari yayitumwe n’iyi nshuti ye ifunze ngo ijye iyambara imbere y’impuzankano yo muri gereza, ko atari azi ko ari imyenda yashakaga kwifashisha mu gutoroka.

Germain Mola we yabwiye Umuseke ko koko yari agiye gutoroka. Yemera ko yabigerageje ariko akagira ibyago. Ati “Hii ni bahati mbaya.”

Akavuga ko uyu ufunze yamusabye ko yazayimuzanira aje kuburana, akifuza ko ubutabera we bwamurenganura kuko ngo atari azi umugambi wa mugenzi we.

Umugororwa ufashwe agerageza gutoroka igifungo akurikiranwa nano mu butabera kuri icyo cyaha, gishobroa guhanishwa igihano cy’umwaka umwe.

Jean Paul NKUNDINEZA
UM– USEKE.RW