Umukinnyi ukina muri USA yongeye mu Amavubi U23

Yves Rubasha ukinira ikipe ya Portland Timbers y’abatarengeje imyaka 18 muri Leta Zunze Ubumwe z’Amerika yongewe mu rutonde rw’abakinnyi b’ikipe y’igihugu y’abatarengeje iyo myaka bari kwitegura umukino na Somalia uzaba kuwa gatandatu.

Uyu mukinnyi akina nka myugariro ku ruhande cyangwa imbere ku ruhande, asanze abandi bakinnyi bakina inyuma bakomeye bahamagawe muri iyi kipe nka Bayisenge Emery, Faustin Usengimana, Rugwiro Herve, Rusheshangoga Michel, Nirisalike Salomon na bagenzi babo.

Rubasha afite imyaka 18, yiteguwe kugera mu Rwanda kuri uyu wa kabiri agahita asanga abandi mu myitozo. Abandi bakinnyi bakina hanze nka Bonfils Kabanda na Nirisalike bakaba baraye bageze mu Rwanda ngo bitozanye nabandi.

Amavubi azakina na Somalia, itsinze ikine na Uganda, itsinze hagati ya zombi ihure na Misiri maze itsinze ijye mu gikomve cya Africa cy’abatarengeje iyi myaka kizabera muri Senegal mu Ukuboza uyu mwaka, muri iki gikombe amakipe atatu ya mbere akazabona tike y’imikino Olempike izabera i Rio de Janeiro muri Brazil mu mpeshyi ya 2016.

UM– USEKE.RW