Umuhungu wa John Garang wari Minisitiri yirukanwe muri ‘Cabinet’

Mabior Garang de Mabior umuhungu w’uwahoze aharanira ubwigenge bwa Sudani y’Epfo John Garang de Mabior, yaraye yirukanywe kuri Minisiteri y’amazi n’umutungo kamere yari abereye umuyobozi, ni mu ivugurura rishya ryakozwe na Perezida Salva Kiir.

Itangazo ry’iri vugurura ryasomwe kuri Televiziyo y’igihugu cya Sudani y’Epfo mu ijoro ryakeye.

Mabior Garang muri iki cyumweru yari yatangaje ko Guverinoma iyobowe na Perezida Salvador Kiir yavanyweho, uyu musore akaba yari muri ba Minisitiri bo ku ruhande rutavuga rumwe na Leta.

Abandi ba Minisitiri bo kuri uru ruhande birukanwe barimo; uw’ubutegetsi bw’igihugu, ushinzwe Petrol, uw’uburezi, uw’umurimo n’ushinzwe ubutaka n’ubwubatsi.

Biravugwa ko aba birukanywe bose bari abantu ba hafi ba Dr Riek Machar. Bose kandi bahise basimbuzwa.

Usibye abaminisitiri birukanwe Adepite 10 bo mu Nteko Ishinga Amategeko nabo bavanywe mu mwanya wabo.

Ibi byagaragaje ko amasezerano y’amahoro hagati ya  Perezida Salva Kiir na Dr Riek Machar ubu nta garuriro atagikurikizwa. Umwuka w’intambara ni wose hagati y’izi mpande.

Ibintu byahinduye isura mu kwezi gushize ubwo abasirikare ba Leta ya Perezida Kiir barwanye n’abo ku ruhande rwa Riek Machar muri Juba.

Abantu 300 bahasize ubuzima mu minsi ibiri gusa, igihugu gisubira mu kaga, abantu 60 000 bahise bahunga igihugu bituma ubu kuva mu 2013 abanyaSudani y’Epfo bamaze guhunga bagera ku 900 000.

UM– USEKE.RW