Umuhanzi Saidi Brazza uheruka Iwawa yongeye gufatirwa mu rumogi

Saidi Brazza, umuhanzi uheruka kwemera ko anywa urumogi ndetse akisabira kujyanwa Iwawa akajyayo akarangiza amahugurwa yaho umwaka ushize akagaruka ahamya ko yavuye ku biyobyabwenge, yagaragaye mu bantu Police yafashe mu mukwabu wo kurwanya ibiyobyabwenge, ndetse nawe yemera ko yananiwe kurureka burundu.

Saidi Brazza wamenyekanye hambere mu ndirimbo “Yameze Amenyo” yavuze ko yavuye Iwawa afite indangagaciro na kirazira by’umuco, ndetse yaranashinze ishyirahamwe ryo kurwanya ibiyobyawenge mu bahanzi ngo yise “Talented Artists Against Drugs”.

Ati “Lakini tumaze kugera hano urubyiruko rwose twavanye Iwawa bose basubiye ku itabi, nsigara ndi njyenyine kandi ari njye Perezida wabo mbacunga bakarunywa kuva mu gitondo kugeza nimugoroba. Kandi ntibabafate.

Buriya ibiyobywenge rero ni ikibazo gikomeye cyane,  niyo mpamvu ababyeyi bafite abana babikoresha babireka umwanya muto bagahita babisubiraho kubera ko imbaraga zo kubireka kandi babibona mu maso yabo bihari…ntibikunda.

Babasore nanjye bandushije imbaraga barankwega, njyewe nashakaga kubazana muri Association ngo baze turwanye ibiyobyabwenge nsanga ahubwo nibo bandushije imbaraga bansubiza kuri ka gatabi.”

Saidi Brazza avuga ko kenshi urubyiruko runywa ibiyobywenge rwifuza guhinduka muri rwo ariko kubera ko muri ‘societe’ bakibibona bagakomeza kubikoresha.

Avuga ku buryo yafashwe, Saidi Brazza yagize ati “Nibwo bwa mbere nambaye amapingu ni igitangaza!”

Ati “Nari mu rugo ntuje, baraza nka saa cyenda z’ijoro barakomanga ndakingura bati ‘unywa agatabi’ ndababwira nti njyewe ndi rasta ndi muri studio ngiye gusohora indirimbo yitwa ‘Ndi umunyarwanda’ yo kurwanya ibiyobyabwenge mu rubyiruko, mfite agatabi gatoya nywa nijoro iyo ndangije akazi, barambwira bati tugende.”

Saidi Brazza avuga ko ubu yumva ari mu gisebo gikomeye nk’umuhanzi, ubu icyo asaba Leta ngo ni ugukinga imipaka neza ibiyobyabwenge ntibyinjire mu Rwanda kuko ngo uko bije ababinywa ntibabireka.

Ati “Basakomeza gusaka cyane ku mipaka abinjira n’abasohoka kugira ngo ibiza bibe bicye, nibiba bicye noneho {ababinywa} tuzabibura natwe turembe noneho tubiveho. Ariko mu gihe ugenda mu gitondo umuntu akayiguhereza akakubwira ngo birahari sinzi ko tuzabireka.

Nk’ubu abana bose bavuye Iwawa nahuye nabo bariho barabinywa, sinzi rero ko tuzakomeza iyo gahunda yo gutwara umuntu Iwawa umwaka umwe agenda agaruka cyangwa…”

Umuvugizi wa Police ACP Theos Badege avuga ko mu bana nk’igihumbi barangiza Iwawa ku mwaka utahera kuri uyu wafashwe ngo uvuge ko kiriya kigo kidatanga umusaruro.

Ati “uyu umwe wasabitswe nabyo akarugarukamo ntabwo wamuheraho uvuga ngo uriya mushinga ntutanga umusaruro. Urumva n’ibitekerezo afite ko bitanafatika, umuntu uvuga ngo nimudufasha murumare hanze aha kuko nimutarumara tuzakomeza kurunywa simba mpamya ko hari umuntu muzima utekereza gutyo…”

ACP Badege avuga ko abava Iwawa bakomeza gukurikiranwa ari nabwo buryo uyu yafashwe kuko mu bitabo bakomeza bakareba ngo uyu wavuye Iwawa ari kwitwara ate hanze no mu mwuga yigishijwe Iwawa.

Martin NIYONKURU
UM– USEKE.RW