Umuhanzi Emmy yerekeje muri USA asiga irushanwa rya PGGSS II

Uyu muhanzi uzwi cyane mu ndirimbo nka “Uranyuze” yaba yamaze kwerekeza mu gihugu cya USA kuri iki cyumweru nkuko byemezwa na zimwe mu nshuti ze, akaba yaba asize igihanga mu irushanwa yarimo rya PGGSS II ryaba risigayemo abahanzi icyenda.

Umuseke.com ubaza bamwe mu nshuti ze za hafi aho yari atuye n’umuryango we Kimironko, zavuze ko Emmy koko yagiye ku cyumweru tariki 06 Gicurasi nubwo ngo byari biteganyijwe ko agenda tariki 08 Gicurasi, gusa ngo Emmy aka ari umusore utavuga menshi utanakundaga kuvuga gahunda ze cyane.

Emmy kugeza ubu utaragira icyo atangaza, bivugwa ko yerekeje i Texas muri USA aho yajyanye n’umuryango we gutangira ubuzima bushya muri kiriya gihugu.

Uwari manager we DJ Theo we yatangarije Inyarwanda.com ko koko Nsengiyumva Emmanuel bita Emmy yajyanye n’umuryango we (ababyeyi n’abavandimwe) muri USA.

DJ Theo ati: “ Emmy namukundaga, ndahombye cyane kuko nari maze kumutangaho amafaranga menshi ariko na none sinamurenganya nta kundi byagenda.”

Uyu muririmbyi wari Numero 1 mu irushanwa rya PGGSS II yagiye adasezeye ku buyobozi bwa East African Promoters na Bralirwa bwateguye iryo rushanwa yarimo. Mushyoma Joseph umuyobozi wa EAP yabwiye Inyarwanda.com ko bataramenya koko niba Emmy yaragiye kuko atabasezeye, bityo ko “Tutahita dutangaza icyo gukora ubu, turabanza ngo tumenye aya makuru by’impamo” bivuga ko nyirubwite atasezeye mu irushanwa ku mugaragaro.

Emmy ngo yaba yari amaze iminsi muri gahunda zo kugenda, dore ko tariki 17/03 ubwo muri Serena Hotel hatangazwaga abahanzi 10 bazahatana muri PGGSS II, Emmy yahagarariwe na Kitoko, bivugwa ko yari i Kampala ashakisha ibyangombwa by’ingendo.

Plaisir Muzogeye
UM– USEKE.COM