Umuhango wo kubyukurutsa INYAMBO mu Rukari. AMAFOTO

Nyanza – Mu kwizihiza umunsi w’Umuganura kuri uyu wa 31 Nyakanga, umuhango wo kubyukurutsa inka z’inyambo wabereye i Nyanza mu Rukari ku rugo rw’Umwami Mutara III Rudahigwa. Aha inka z’umwihariko mu mateka, zamuritswe, ziruhirwa, zirakamwa, abana banywa amata, abatahira bazivuga amazina biratinda. Mu muhango nyarwanda unogeye ijisho n’ugutwi.

Inyambo zari inka zatoranyijwe, ku munsi w’Umuganura zikaza kumurikirwa Umwami ziri kumwe n’abatahira bazivuga amazina rubanda rukizihirwana n’Umwami ku munsi ukomeye nk’uyu wa none.

Gusa aya mateka Abakoloni ntibaretse akomeza kuba gakondo, barayarwanyije kugeza umunsi w’Umuganura uciwe mu 1925.

Inyambo ntizari inka zororerwa gutanga amata n’inyama, zari umwihariko mu nka zatozwaga umuco, zikumvira, zikiyereka, zigatakwa amasaro maze zikavumera kuri gahunda umunezero ugasaba abazireba umunsi ugahinduka ibirori.

Izi nka bigaragara ko zatojwe, zumvira cyane abo zizi, barazihamagara zikaza, zihagarara aho zeretswe zikagenda zibwiwe ndetse zikamenya umuntu mushya uziri iruhande. Iyo ushatse gufata inyana yayo nyina igaragaza amahane ku buryo ishobora no guhutaza umuntu ushaka gufata inyana yayo.

Medard Bashana uyobora inzu ndangamurage yo mu Rukari yabwiye Umuseke ko iki gicumbi cya Rudahigwa ari inzu yatangiye kubaka mu 1932, aha ni naho hari indi nzu nyarwanda igaragaza uko se wa Rudahigwa, Umwami Musinga yari abayeho.

Iyo ni inzu nini yitwa ikambere igaragiwe n’izindi nzu gakondo nto ziri mu gikari, aha niho inyambo ziba ziri.

Izabiliza Jeanne Umunyamabanga Nshingwabikorwa w’Intara y’Amajyepfo wari umushyitsi mukuru  yatangaje ko   gusigasira umuco  nyarwanda  bigomba guherekezwa  no gusura  ingoro  ndangamurage ziri hirya no hino mu gihugu.

Umunsi wo kumurika inyambo wabimburiwe  no  gusobanurira  abitabiriye  uyu munsi  amwe mu mateka  yaranze  u Rwanda  mu gihe cy’umwami Mutara III Rudahigwa, berekwa  igicumbi cy’umuco n’inka z’inyambo zabaga  i bwami ndetse n’imihango  yose  yagombaga gukorerwa  mu Rukari.

Muri ibi biganiro yagize ati:’’  Kuvuga ko ukunda igihugu,  ariko  ntugire umwanya wo gusura  ahantu nk’aha  ntabwo waba ukunda u Rwanda.’’

Bihira  Francois, utuye mu murenge wa Rwabicuma akaba numwe wabanye n’Umwami  Mutara wa III Rudahigwa, yavuze ko  mu muco nyarwanda  Umuganura  uza ku isonga, aho  abaturanye bicaraga bagasangira,  abana bagatura  inzoga y’umuganura  ababyeyi babo nabo bakabaha umugisha, yongeyeho ko ubu  usanga  abanyarwanda  babaye ba nyamwigendaho  ari nabyo    bituma umuco nyarwanda ucika.

Muri uyu muhango ubanziriza  umunsi ngaruka mwaka w’Umuganura, hamuritswe inyambo 10  zirenga.

Muri 2008 niho  uru rugo rwafunguwe nk’ingoro y’umurage, mu 2010 haje ishyo ry’inyambo hatangira kuba ahantu hakurura ba mukerarugendo b’abanyarwanda n’abanyamahanga. Ubu abahasura babarirwa hagati ya 3 000 – 4 000 ku kwezi, baje kureba inyambo n’aya mateka y’urugorw’Umwami.

Kuva icyo gihe abasura mu rukari bariyongereye amafaranga yinjiye yavuye kuri miliyoni 15 muri 2010 ubu ageze kuri miliyoni 45 ava mu basura inzu ndangamurage.

Umulisa Alphonse umuyobozi w’Ingoro ndangamurage z’u Rwanda, yibukije ko Umuganura wongeye gusubira gutangira kwizihizwa mu 2011, aha hari mu rwego rwo kongera gusubiza agaciro umuco nyarwanda abakoloni baciye mu myaka 86 yari ishize.

Kubyukurutsa Inyambo ngo wari umuhango ukomeye cyane mu birori by’umuganura, ni nawo wabimburiraga indi yose i Bwami. Umwami niwe ubwe wahaga abana amata yifuriza abanyarwanda gutunga no gutunganirwa.

Nyuma yo guha abana amata y’Inyambo nibwo abantu bamurikaga umusaruro uturuka ku buhinzi bagezeho.

Umuganura wari umunsi ugamije kwigisha abanyarwanda indangagaciro zo gukunda igihugu, gusangira, gukunda umurimo, gushimira Imana n’ubumwe bw’abanyarwanda.

Photo/Eric BIRORI/UM– USEKE

Elisée MUHIZI & BIRORI Eric
UM– USEKE.RW