Umugaba wa FDLR wungirije yatawe muri yombi

Amakuru ari ku mbuga mpuzambaga zitandukanye aravuga ko Umugaba mukuru wungirije w’umutwe wa FDLR General Stanislas Nzeyimana uzwi kandi ku mazina ya Deogratias Bigaruka yatawe muri yombi mu gihugu cya Tanzania.

Umunyamakuru Simone Schlindwein uhagarariye ikinyamakuru TAZ cyo mu Budage mu Karere k’ibiyaga bigari mu bihugu bya Uganda, u Rwanda, Repubulika Iharanira Demokarasi ya Congo, Uburundi na Sudani y’Amajyepfo yatangaje iyi nkuru ku rubuga rwe rwa twitter agira ati “Umugaba mukuru wungirije w’abarwanyi ba FDLR yafatiwe i Kigoma muri Tanzaniya.”

General Nzeyimana umaze igihe ashinzwe ibikorwa bya gisirikare mu mutwe wa FDLR ni umwe mu bantu umunani basabiwe ibihano n’umuryango w’abibumbye mu kwezi kwa gatandatu umwaka ushize nk’uko byagaragagwe na raporo y’uyu muryango yasohotse icyo gihe.

Hari amakuru avuga ko General Bigaruka yazamuwe mu ntera mu minsi ishize kugira ngo asimbure General Mudacumura mu kuyobora igisirikare cya FDLR kidasiba kuvugwaho guteza umutekano muke mu Burasirazuba bwa Congo.

Nzeyimana Stanislas (Bigaruka) yavutse mu 1966 mu cyahoze ari Komini Mugusa i Butare, raporo y’akanama k’umutekano ka UN agashami gashinzwe ikusanyamakuru kavuga ko uyu mugabo hagati y’umwaka wa 2009 na 2011 akunda cyane kuva muri Kivu ya Ruguru muri Congo akerekeza i Kigoma muri Tanzania, ari naho bivugwa ko yafatiwe ubu.

Uretse General Bigaruka wagaragaye muri Raporo y’Umuryango w’Abibumbye isabira ibihano abantu bagira uruhare mu guhungabanya umutekano muri Repubulika Iharanira Demokarasi ya Congo Kinshasa abandi bari mu buyobozi cyangwa bavuzweho kukorana na FDLR bayigaragayemo ni aba bakurikira:

Uwagaragaye ari imbere y’abandi muri iyo raporo ni Gen. Gaston Rumuli Iyamuremye umaze iminsi ayoboye umutwe wa FDLR by’agateganyo.

Hari kandi Gen. Sylvestre Mudacumura wasimbuye Callixte Mbarushimana wahoze ari umunyamabanga mukuru wa FDLR.

General Leodomir Mugaragu wishwe n’abarwanyi b’umutwe wa FDC ku tariki ya 12 Mutarama 2012 nawe yashyizwe kuri urwo rutonde.

Colonel Léon Mujyambere uyobora FDLR-FOCA akaba ariwe wasimbuye General Leodomir Mugaragu nyuma yo kwicwa nawe yagaragaye kuri urwo rutonde.

Uru rutonde rwanagaragayeho Ignace Murwanashyaka ufatwa nk’uwashinze umutwe wa FDLR ndetse na Straton Musoni nawe uri mu bayobozi ba FDLR.

Umunyekongo General Sheka Ntabo Ntaberi wahoze ku rutonde rw’abiyamamariza kuba umudepite mu matora yabaye mu Ugushyingo 2011, ariko akaba yarigeze gukorana na FDLR nawe ni umwe mu bagaragaye kuri uru rutonde.

UBWANDITSI
UM– USEKE.COM