Uganda:Yakiwe igifungo cy’imyaka 15 azira gusambanya umwuzukuru we

Urukiko rukuru rwa Mukono muri Uganda rwakatiye igihano cy’igifungo cy’imyaka 15 uwitwa Godfrey Wekale   w’imyaaka 47 y’amavuko azira gusambanya umwuzukuru we w’imyaka 12.

Umucamanza Vincent Zehurikize wakatiye iki gihano uyu mugabo avuga ko Wekale  ahamwa n’icyaha cyo gusambanya umwuzukuru we.

Agira ati:” Byagaragaraga ko afite isoni n’ikimwaro cyinshi asa n’uwicuza ibyo yakoze, kubera gusambanya umwana w’umwana we. Ndagira ngo mbonereho umwanya wo gutaha ubutumwa abantu nk’aba mbamenyesha ko Inkiko zitazabagirira impuhwe”.

Akomeza avuga ko niba uyu mugabo atanyuzwe n’imikirize y’urubanza ko afite uburenganzira bwo kujurira bitarenze iminsi 14 nk’ibisanzwe.

The Newvision dukesha iyi nkuru ivuga ko uyu mwana yasambanyijwe na sekuru ubwo yari yavuye  I wabo agiye  kwa sekuru mu minsi mikuru.

Umushinjacyaha muri uru rubanza avuga ko  ubwo uyu yari aryamye asinziriye yagiye kumva akumva arimo gukorerwa imibonano mpuzabitsina yakwitegereza neza agasanga ni sekuru Wekale.

Uyu mwana wiga mu mwaka wa gatandatu w’amashuri abanza avuga ko yagerageje gusoka ngo acike , sekuru akamuganza maze akanamubuza kugira umuntu n’umwe abwira ibyabye.

kuva icyo gihe rero ngo uyu mugabo yakomeje kujya asambanya uyu mwana kugeza ubwo  nyirakuru w’uyu mwana yatangiye kubakeka kuko ngo  uyu  umwana yari yarahinduye  ingendo.

Iperereza ryaje gukorwa amakuru aba impamo maze uyu mugabo ashyikirizwa Polisi maze na yo imushyikiriza ubutabera.

Icyakora ariko umushinjacyaha ntiyanyuzwe n’igihano urukiko rwakatiye uyu mugabo kuko yari yarasabye ko rugomba kumukatira igihano  kizamuha isomo  ku buryo atazongera gutekereza gukora igikorwa nk’iki.

Agira ati:”Wekale ni umuntu mukuru wari ufite ububasha kuri uyu mwana, akaba yari mu bantu ba mbere bakagombye ku murinda ibintu nk’ibi, ariko ni we wahisemo ku musambanya. Njye rwose  n’umva mwari mu kwiye kumuhanisha igihano kiremereye kurusha iki mwahaye”.

Jackline Kagoya,  uhagaririye uyu mugabo mu rukiko  asaba urukiko kugabanyiriza igihano umukiliya we ngo kuko yagaragaje ko  yicuza ibyo yakoze  kandi ko imyaka itatu amaze muri gereza ko yamuhaye isomo. Urukiko rwamenye iki kibazo mu Kuboza ku mwaka 2009 maze rutangira  kumukurikirana.

UM– USEKE.RW